Čoahkkimis ledje gulahallandirektevra Erik Palm, Sámi klinihka klinihkkajođiheaddji Amund P. Teigmo, sátnejođiheaddji Anders S. Buljo, várresátnejođiheaddji Elle M. D. Oskal, ovdagotti áirasat Klemet E. Hætta, Nils A. Hætta, Ole A. Turi, váldolávdegotti jođiheaddjit Nils J. Hætta ja Nils O. Skum, suohkanváldodoavttir Anne L. Kalstad, dearvvašvuođa ja fuolahusa suohkanjođiheaddji Kent A. Hætta ja suohkandirektevra Karin Hætta.

Čoahkkima fáddá lei ságastallan buohcciviessodirektevrrain dearvvašvuođafálaldaga birra Guovdageainnu suohkana ássiide.

Lea oahpes ášši ahte vuordináigi ja mátki lea guhkki go galgá spesialistta lusa, ja dasa lassin leat Guovdageainnu pasieanttain dávjá giella- ja kulturhástalusat.

Suohkanváldodoavttir ovdanbuvttii sávaldaga oažžut eanet gáiddus dikšofálaldagaid Guovdageainnu álbmogii. Buohcceviessodirektevra lei hui positiivvalaš go guoská eanet gáiddus dikšofálaldagaide ja sámi pasieantta vuhtiiváldimii.

Guovdageainnu suohkanváldodoavttir áigu ovttasráđiid Finnmárkku buohcciviesu fágabargiiguin geahčadit vejolašvuođaid oažžut iešguđetlágan dikšunfálaldagaid báikkálaččat Guovdageainnus. Guovdageaidnu lea maid mielde ovddideamen vejolaš pilohtaprošeavttaid dán oktavuođas. 

Sátnejođiheaddji giitalii go Guovdageaidnu lea ožžon 2 ođđa virggi SÁNAG:i, muhto dát lea čatnon dasa ahte mii nagodit rekrutteret fágabargiid dáid virggiide. Lea hirbmat dehálaš midjiide oažžut dáid virggiid Guovdageidnui, ja jus dovddat ovttage geas lea 3-jagáš allaskuvlaoahppu dearvvašvuođa dásis, de ávžžuhat sin ohcat, dahje jus ieš leat kandidáhta, de oza áinnas dáid ođđa gelddolaš virggiide. 

Virggid birra sáhtat lohkat dán siiddus. 

Njunošpolitihkarat, suohkanjođiheaddjit, suohkanváldodoavttir ja Finnmárkku buohcciviesu ovddasteadjit