Gaskavahkku 16.08 leat seminárat mat heivejit eatnasiidda, spábbačiekčanskuvla mánáide, bearaškonsearta ja loahpas: Slaget om vidda, legendáralaš spábbačiekčamat Guovdageainnu IL ja Kárášjoga Nordlys IL gaskkas. Vuosttaš mii dáhpáhuvvá dán beaivvi lea gelddolaš seminára maid NAV lágiida ovttas Guovdageainnu ealáhussearvviin. Semimára birra sáhtát lohkat dáppe.
Dii. 14:30: Spábbačiekčanskuvla ovttas Jonas Johanseniin, TIL 2020 valáštallanjođiheaddji, Bákteváris
Jonas Johansen lea “TIL 2020” stuora áŋgiruššama valáštallanjođiheaddji Romssas. Sin ulbmil lea beassat bajimus dássái nissoniid ráidočiekčamis. Son lea maid Isak Hansen Aarøen persuvnnalaš hárjeheaddji gii beaivválaččat čiekčá Manchester Unitedis. Jonas bovde nuorra spábbačikčiid ja báikkálaš hárjeheddjiid nuvttá spábbačiekčanskuvlii Guovdageidnui. Lágideaddji: Arctic Race ja Kautokeino IL
Dii. 16:00: "Ollašuhttit nieguid" Valaštallanseminára Diehtosiiddas
Diibmosaš valáštallanseminára buohkaide man ulbmil lea movttiidahttit olbmuid čuovvut iežaset nieguid ja beroštumiid. Håvard Klemetsen, Guovdageainnus bajásšaddan, boahtá ruoktot muitalit Guovdageainnu mearkkašumi su mátki olympiagollái lotnolas gilvvohallamis. Son searvá soffáságastallamii ovttas Tom Høgliin, gii lea ovddeš riikkajoavkočiekči spábbačiekčamis. Soai háliideaba juogadit vásáhusaid movt leaba olahan bajimusaid dássái ja maid báikkálaš doarjja mearkkaša ovdáneapmái. Dasto áigu Jonas Johansen, valáštallanjođiheaddji “TIL 2020” muitalit makkár vejolašvuođat leat nieiddaide ja nissoniidda geat háliidit áŋgiruššat spábbačiekčamii dáppe davvin. Seminára lea dii. 16:00 Sámi allaskuvllas. Aleksander Johnsen, Finnmárkku Spábbačiekčanbiires jođiha soffáságastallama. Lágideaddjit: Arctic Race ja Olympiatoppen Nord-Norge.
Dii. 17:30: Bearaškonsearta suohkanvistti olggobealde
Dáppe guoimmuhit Bernt Mikkel Haglund ja juoigit, dán jagáš BlimE-artista Ánde Gaup ja Dimitri Joavku. Dáppe beasat maid oaidnit min iežamet Máret Ánne Sara dáidaga mii galgá ilbmat márkanis. Dasa lassin čalmmustahttit ahte Guovdageainnu IL lea ožžon čuovggaid spábbačiekčanšilljui. Lágideaddji: Sámi Musihkkafestivála.
Dii. 18:30: Nordlysrein guossoha liegga borramuša gehččiide konsearttas. Sponsor: Seastinbáŋkovuođđudus ja Guovdageainnu suohkan.
Dii. 19:30: Slaget om vidda: Guovdageaidnu vs. Nordlys. Báktevárri spábbačiekčanšillju
Dál mii beassat fas vásihit dán árbevirolaš čiekčama Báktevári spábbačiekčanšiljus. Boares sáŋgárat leat goappašiid joavkkuin, ja vel soames ođđa nástti. Lágideaddji: Guovdageaidnu IL
Bures boahtin buohkaide!
