Influeansa addá febera, vuoiŋŋahatdávdamearkkaid ja deahkkebákčasiid, muhto manná dábálaččat badjel. Áhpeheamet, vuorrasiid ja kronalaš buohccit leat eanet suojeheapme duođalaččat buohccát.
Influeansa dávdamearkkat
Dábálaččat bohtet influeansa dávdamearkkat fáhkka, ja dávjá:
- Feber
- Goikegosahat
- Deahkkebákčasat
- Oaivebávččas
- Váikkuha dábálaš dearvvašvuođadili
Hárve leat čoavjegivssit, muhto sáhttá leat luhčadávda, earenoamážit mánáin. Influeansa bistá dábálaččat 7-10 beaivvi.
Virusdávddain sáhttet komplikašuvnnat čuožžilit, dego bakteriijainfekšuvdna geahpesboalddáhagain, skoavdevulššiin dahje bealljenávhllahagain.
Maid galggat dahkat jus leat aitto čuožžilan vuoiŋŋahatdávdamearkkat?
Rávvagat dutnje geas lea influeansa
Influeansa lea virusinfekšuvdna ja manná dábálaččat badjel. Muhtin háviid sáhttá infekšuvdna dagahit ahte buohccá duođalaččat, ja de berre váldit oktavuođa doaktáriin. De dálkkoda vuosttažettiin dávdda dávdamearkkaid.
Vuoiŋŋas ja juga čázi
Jus leat buohcci, berret vuoiŋŋastit ja juhkat nohka čázi. De lea du gorut buoremusat ráhkkanan birget influeanssain.
Dálkasat bákčasiid vuostá
Sihke bákčasiid ja febera sáhttá láivudit ovdamearkka dihte paracetamolain dahje ibuprofeniin.
Dárbu dearvvašvuođaveahkkái
Jus vuorjašuvat buohcci máná dihte, váldde oktavuođa dearvvašvuođabálvalusain.
Jus leat buohcci influeanssain ja áhpeheapme dahje gulat muhtin riskajovkui, berret riŋget fástadoaktárii dahje doavttirváktii vai ahte oažžut rávvagiid dárbbašlaš divššu ja čuovvuleami.
Váldde álo oktavuođa doaktáriin jus dilli vearáska.
Riŋge doaktárii dakkaviđe jus:
- Orut buot goikan, nu movt njálbmegoikkisvuohta ja dárbbahat hárve cissat
- Vuovssadat ja leat váttisvuođat doalahit juhkamuša, nu ahte lea várra ahte goikat
- Lea vuoigŋanváttisvuođat dahje leat álgán vuoigŋat jođánit
Dárbu dakkaviđe dearvvašvuođaveahkkái
Riŋge 113 jus sus geas lea influeansa:
- Leat stuora vuoigŋanváttisvuođat
- Leat raddebákčasat
- Lea sáhppes dahje alitlágan ivdni baksamiin
- Leat geasáhat dohppehallamat
- Ii reagere dábálaččat dahje orru moivemen/jorbbodan
Influeansabuohccit geain leat garra dávdamearkkat, earenoamážit sii geat gullet komplikašuvdna riskajovkui, berrejit bearráigehččojuvvot. Nu movt eará dávddain mat sáhttet jođánit vearáskit, de lea dárbbašlaš ahte lea oktavuohta buohcci olbmuin ihkku maid.
Loga eambbo influeansa birra Helsenorge neahttasiiddus.
Influeansaboahku
Lea ain vejolaš váldit influeansaboahku.
Boahtte boahkuheapmi lea dearvvašvuođaguovddážis gaskavahkku cuoŋománu 27.beaivvi, dii. 12:00-15:00.
Diŋgo boahkuhanáiggi telefovnna 485 00 784 dahje Helsenorge neahttasiiddu bokte.