-Sihke mii ja arkiteavttat leat oahppan ollu dán váhku, muitaleaba geavaheddjiidkoordináhtorguovttos Kirsten Anne Grethe Eira ja Ole Einar Hætta bottožis dán vahku geavaheddjiidčoahkkimiin. Soai illudeaba ođđa skuvlii ja leaba movttegat go leaba ožžon vejolašvuođa searvat plánemii. -Lea dehálaš ahte mii geat galgat leat skuvllas beassat buktit min vásihusaid. Mii dovdat Guovdageainnu báikkálaš dárbbuide, ja digáštallamat arkiteavttaiguin ja entreprenevrraiguin leat ávkkálaččat sihke midjiide ja sidjiide. –“Já nie!”-vásihusaid leat ožžon ja addán, muitala Hætta, gii muđui lea hirbmat duhtavaš go arkiteavttat nu bures leat ipmirdan skuvlla dárbbuid.
Geavaheddjiidkoordináhtorguovttos Kirsten Anne Grethe Eira ja Ole Einar Hætta muitaleaba ahte leat leamaš buori čoahkkimat arkiteavttaiguin ja buorre oaidnit tevnnegiid.
Dán vahku leat leamaš čoahkkimat Guovdageainnu ođđa skuvlla geavaheddjiiguin. Mánnodaga deaivvadedje buot bargit ovttasdoaibmafása álggaheapmái kulturviesus. Erik Bratholm (WSP) álggahii geavaheaddjimielváikkuheami rámmaid ovdanbuktimiin, ovdal go de bargit joavkkuid mielde bukte evttohusaid skuvlla iešguhtet funkšuvnnaide. Beroštupmi lea valjit, ja arkiteavttat váldet fárrui ollu evttohusaid gárvves tevnnegiid guvlui: -Dát lea hirbmat ávkkálaš midjiide, cealká arkiteakta Susanna Ahlander (Ola Roald arkitektur) daid evttohusaid hárrái máid dál ožžot bargiin, ohppiin ja váhnemiin. Dál mii goartilastit ovdal go vadjagoahtit. Deháleamos midjiide lea ahte nagodit dustet skuvlla dárbbuid, ahte oahppit, bargit ja váhnemat ožžot skuvlla mii doaibmá árgabeaivvis. -Mii mannat dál min tevdnenbeavdái, ja bargat tevnnegiiguin daid boahttevaš vahkuid, ovdal go ovdanbuktit ođđa čovdosiid skuvlla geavaheddjiide fas vahku 7.
Vaikko olu lea juo sajis, de leat eambbo áššit máid galggašii mearridit. Bivttasheŋgehatčovdosat, johtolatmannu, joavkolanjaid sturrodat, universála hábmen ja uvssaid sajusteapmi: fáttát leat máŋga, ja veahážiid mielde ságaškuššojuvvojit ja vuođđuduvvojit čuolmmat. Erenoamáš dárbbut sámi skuvllas, nu movt čovdosat dállastanlanja, duddjoma, bohcconjuovvama ja giela hárrái deattuhuvvojit proseassas.
-Mii hirbmadit illudit beassat ođđa skuvlii, dadjá Guovdageainnu nuoraidskuvlla VBL-ovddasteaddji, Per Otto Pulk. -Dá lea min boahtteáigi, ja skuvla šaddá buorre viessu olles suohkanii. Pulk, gii ieš bargá viessodoaimmain, berošta nanu ja spáitilis čovdosii movt ođđa skuvlla doaimmahit ja máŧasdoallat.
Erik Bratholm (WSP) čilge proseassa ja ovdanbuktá geavaheddjiidčoahkkimiid rámmaid vahku 3 ovddas.
Biebmu ja dearvvašvuođa fága oahpaheaddjit geahčadit ođđa skuvlagievkkana plánačovdosiid.
Ođđa oahppoplána deattuha geavatlaš ja máŋggabealálaš oahpahusa. Dá geahčadit luonddufágaid oahpaheaddjit luonddufágalanja čovdosiid.
Ole Einar Hætta čilge bohcconjuovvama arkiteavttaide ja entreprenevrii.
Eanadatarkiteakta Mari Bergset (Lo:Le arkitekter), VBL-áirras Per Otto Pulk ja nuoraidskuvlarektor Ellen J. Sara Eira ságaškuššet ođđa skuvlla olgobirrasa čovdosiid. Arkiteakta Ola Roald čuovvu mielas ságastallama.