Prošektajođiheaddji Kirsti Monica Eira ja sátnejođiheaddji Sámmol Ánte. Maria Graff

Suohkan lea guhká bargan bidjat johtui Láigoheamis eaiggáduššamii-ortnegiin. 

- Dát lea dehálaš olahus suohkanii. Alla viessohattit, divrras áigi ja reanttuid badjáneapmi dagaha ahte oallugiin leat hástalusat beassat viessomárkanii dábálaš vugiid mielde. Buorre ja oadjebas orrundilálašvuohta addá dárbbašlaš vuolggasaji bargoeallima oassálastimii, oahpu gazzamii ja doaibmi sosiála eallimii. Mii leat hui ilus dál go viimmat beassat almmuhit dán ortnega, lohká prošektajođiheaddji Kirsti Monica Eira.

Láigoheamis eaiggáduššamii-ortnet lea olbmuide geat eai oaččo doarvái viessoloana dábálaš báŋkkus dahje álggahanloana suohkanis oastit viesu, muhto geat árvvoštallojit nagodit ruhtadit ja eaiggáduššat iežaset viesu áiggi mielde.

Ortnega bokte láigoha oasseváldi álggos viesu ovtta áigodaga. Suohkan addá čuovvoleami ja bagadallama mii galgá veahkehit oasseváldi olahit ruhtadeami ja nagodit eaiggáduššat viesu. Dán maŋŋil oažžu oasseváldi vejolašvuođa oastit viesu.

- Ruoktu addá oadjebasvuođa ja dat váikkuha buot osiid olbmo eallimis. Suohkan áigu veahkehit eambbosiid eaiggáduššat iežaset viesu ja sajáiduvvat Guovdageidnui. Láigoheamis eaiggáduššamii-ortnet lea dehálaš gaskaoapmin dasa, lohká sátnejođiheaddji Sámmol Ánte.

Vuosttaš vuorus besset 2-3 oasseváldi mielde ortnegii.

Ohcanáigemearri lea čakčamánu 1. beaivvi 2026.

Ohcanskovi ja eanet dieđuid gávnnat dákko.