Gaskaboddosaš skuvla - gos eat vuos dieđe

Gos galget oahppit ja bargit leat go gaikkodit boares skuvlla ja hukset ođđa? Čuolbma galgá meannuduvvot suohkanstivračoahkkimis cuoŋománu.

Dán vahku leat oahppit, váhnemat ja bargit bovdejuvvon ságaškuššat ášši ja buktit oaiviliiddiset čuovvovaš njealji molssaeavttuide:

Gaskaboddosaš skuvla molssaeavttut
Molssaeaktu Mánáidskuvlla ohppiid oahppolanjat Nuoraidskuvlla ohppiid oahppolanjat
1 Dálá nuoraidskuvla Guokte ceahki Báktehárjjis, okta ceahkki LES-viesus
2 Dálá nuoraidskuvla Guokte ceahki Báktehárjjis, okta ceahkki modulaviesus olggobealde Báktehárjji
3 Dálá nuoraidskuvla Golbma ceahki Máze skuvllas
4 Dálá nuoraidskuvla Golbma ceahki modulaviesus márkanbáikkis

 

Ášši duogáš lea ahte dálá mánáidskuvla galgá gaikkoduvvot go geasseluopmu álgá, nu ahte sáhttit huksegoahtit ođđa skuvlla geasi mielde. Dálá vuojadanhálla gaikkodeapmi álgá ovdal dan. Suohkan ferte dan dihte gávdnat gaskabođđosaš oahpahuslanjaid ohppiide ja bargiide borgemánu 2021 rájes, mat galget adnot dan botta go hukset ođđa skuvlla. Dán áigodaga árvvoštallet bistit 1-2 jagi.

Gaskaboddosaš skuvlalanjat leat hárve buoremus čovdosat. Suohkan berošta goitge gávdnat lanjaid mat leat buorit, ja sáhttet addit dohkálaš čovdosa ohppiide, váhnemiidda ja bargiide, ja mat leat lágaid ja láhkaásahusaid mielde, dan botta go hukset.

Láigohit modulaviesuid (bráhkaid) ii leat iešalddis ekonomalaččat gánnáhahtti. Golut leat oalle stuorrát, eai ge atte dahje addet unnán bistevaš árvvu suohkana ássiide. Ekonomalaš beali ferte deattuhit gaskaboddosaš čovdosiid nu movt dás. Dan dihte sáhtte leat áigeguovdil atnit dálá viesuid mat leat suohkana.

Lea maiddai álki gávdnat hehttehusaid molssaeavttuin, ja lea dehálaš ahte várálašvuođa ja negatiiva bealit čoavddusevttohusain bohtet ovdan. Dalle lea suohkanis vejolašvuohta bidjat doaibmabijuid ovdagihtii. Suohkan ávžžuha seammás daid iešguhtet geavaheaddjejoavkkuin geahčadit vejolašvuođaid daid iešguhtet čovdosiin.

Buot njealje evttohusa mearkkašit ahte mánáidskuvla fárre dálá nuoraidskuvlii, ja dainna lágiin sihkkarastá oadjebas olgobirrasa, oahpes johtolatčovdosa ja beaivválaš stáđisvuođa nuoramus ohppiid váste. SAÁO sáhttá leat nuoraidskuvllas dahje nuoraidviesus mii lea das bálddas. Nuoraidskuvlla váste evttohuvvojit njealje iešguhtet čovdosa, geahča tabealla. Golbma dan njealji čoavddusevttohusain mearkkašit ahte nuoraidskuvlaohppiide šaddet oahpahuslanjat márkanbáikkis, okta evttohus mearkkaša bussemátkkiid Mázii.

Čoavddusevttohusaid listu ii geađgái čullojuvvon; eará vejolašvuođat ja molssaeavttuid kombinašuvnnat sáhttet gávdnot nu ahte válljejuvvon čoavddus šaddá buot buoremus.

Ášši galgá politihkalaččat meannuduvvot, ja gaskaboddosaš skuvlla čovdosa válljen galgá mearriduvvot suohkanstivrras cuoŋománu 2021. Áššis lea áššemeannudanáigemearri guovvamánu 17. beaivvi 2021. Mielváikkuhanproseassas lea vuoruheapmi vahkuid 5 ja 6, ja maŋemus buktit čálalaš evttohusaid lea gaskavahku guovvamánu 10. beaivvi 2021.   

Mii ávžžuhit váhnemiid doallat oktavuođa iežaset VBL-áirasiin. Cealkámušaid sáhttá muđui maid sáddet prošeaktaovddasteaddjái Mikkel Ole Sokki, ovdal gaskavahku guovvamánu 10. beaivvi: mikkel.ole.sokki@kautokeino.kommune.no