Hástalus lea leamaš ahte buot jagiid lea leamaš okta skuvlaluohkká mii lea ožžon ovddasvástádusa lágideamis ja mii lea ožžon 10 000 ruvdnosaš doarjaga dan váste. Doarjja lea lassánan 20 000 ruvdnui, goitge čájehuvvui sullii 3 vahku ovdal doaluid ahte ii oktage skuvlaluohkká háliidan lágidit almmolaš doaluid dán doarjagiin.

Suohkan almmuhii ruovttusiidui 16.01.24 artihkkala jearran dihte leago oktage gii háliida lágidit almmolaš doaluid, 30 000,- ruvnno ruhtadoarjagiin. Nu go ovddit jagiid ge, de gokčá suohkan Báktehárjji láigogoluid.

Suohkan oaččui ovtta ohcci ja juolludii lágideami sidjiide. Lágideddjiin ledje gažaldagat maidda eai ožžon vástádusa doarvái buori áiggis, ja dan geažil gesse ohcamuša 29.01.24.

Dan maŋŋil lea suohkan bargan eará čovdosiiguin, muhto ii leat áibbas lihkostuvvan soahpat ovttainge, ja danin ii leat almmuhuvvon makkárge diehtu almmolaš doaluid birra suohkana bealis.  

Dat šaddet almmolaš doalut, ja nu go dál orru leamen, šaddá dii. 15:00 rájes Báktehárjjis. Sátnejođiheaddji doallá sártni, Sámisoga lávlaga oktasaš lávlun, kulturbálkkašupmi juhkkojuvvo, ja vuvdojuvvo juobe káffe ja gáhkut, ja mii geahččalit oažžut sadjái kultuvrralaš guoimmuheami.

Suohkandirektevra šálloša go ná lea šaddan dán jagi, mii váldit oahpu dás ja goappašat našunálabeaivvit galget dán rájes juolluduvvot buori áiggis ovdal doaluid.