Guovdageainnu suohkan geige jahkásaččat kulturbálkkašumi. Bálkkašupmi geigejuvvo olbmuide, servviide dahje organisašuvnnaide geat iežaset doaimmas ovddidit kultuvrra ja oahpahit ođđa buolvvaid. Bálkkašumis lea 10 000 ru árvu, ja čuovvu maiddái diploma. 

Dán jagáš vuoiti lea viššalis barggu bokte ja stuora beroštumiin guhkit áigge áŋgiruššan ja ovddidan sámi kultuvrra. Son dovdá Guovdageainnu servodaga bures, ja lea jo nuorran áŋgiruššan ovddidit servodaga. Son searvá buriin movttain ja bargá áŋgirit Guovdageainnu ja Sámi servodaga ovddas. Sus lea hui stuora beroštupmi sámegiela, sámi musihkka ja árbevirolaš luođi ovdáneapmái. Oahpahus, juoigan, lodden, eanadoallu ja boazodoallu leat earret eará su váibmoáššit. Lea maiddái searvan politihkkii guhkit áiggi. 
Son lea maiddái leamašan álggahanbarggus sámi stuorámus musihkka gilvvu: Sámi Grand Prix, ja lea dan ožžon julggiid nala. Lea ollu jagiid doaibman stivrajođiheaddjin ja jođihan Sámi musihkka festivála, ja bargan dan nala ahte galgá ovdánit. Dainna lea lihkostuvvan hui bures.  
Son lea váldoolmmoš Juoigalasaid juoigansearvvis, ja dakko bokte ovddida árbevirolaš luođi. Sáhttit namuhit Juoiganjiena ja Luohtehápma lágidemiid. Dat leat ođđa fálaldagat mat čalmmustuhttet juoigama ja luođi, ja loktejit luođi árvvu. 
Ii leat dušše Guovdageainnu álbmot mat besset ávkkástallat dan kulturoasi, muhto dákkár bargu ávkkuha olles sámi ovdáneapmái.

Guovdageainnu suohkana 2022 kulturbálkkašupmi geigejuvvui Migál Elle Gárena Ellii, Ellen J. Sara Eirai, su barggu ovddas loktet sámi kultuvrra ja servodaga.