Disdaga njukčamánu 5.beaivvi 2024 lei Guovdageainnu suohkan bovdejuvvon čoahkkimii oahpahus- ja dutkanlávdegottiin.

Guovdageainnu suohkan lei ožžon 30 minuhta čoahkkináiggi ja sátnejođiheaddji válljii bidjat fuomášumi daid buriid vejolašvuođaide mat suohkanis leat fállat gáiddusoahpahusa davvisámegielas ohppiide geat orrot miehtá Norgga. Suohkan lea áŋgiruššan hukset gáiddusoahpahusfálaldaga Máze skuvllas ja doppe leat dál sullii 50 oahppi geat ožžot gáiddusoahpahusa. Guovdageainnu suohkan oaivvilda ahte lea buorre vuođđu ásahit nationála davvisámi gáiddusoahpahusguovddáža dohko. Máze skuvla lea dál lotnolas skuvla mas lea dábálaš oahpahus mánáide geat orrot Mázes ja gáiddusoahpahus mánáide geat orrot eará sajiin Norggas. Lávdegotti miellahtuin lei stuora beroštupmi gullat vejolašvuođaid birra eanet hospiteren/giellalávgun, vejolašvuođaid birra joavkooahpahussii, movt seailluhit skuvlafálaldaga Máze álbmogii ja dan nanu, báikkálaš kultuvra- ja giellagelbbolašvuođa birra mii mis lea Mázes. Lávdegotti láhtuin ledje ollu gažaldagat nugo ovdamearkka dihte vejolašvuođat kulturoahpahussii Teams bokte, diibmoplánaid ovttastahttima birra ja ášši ekonomalaš beliid birra. Sátnejođiheaddji geigii lávdegotti miellahtuide dokumeantta mii čilge gáiddusoahpahusvejolašvuođaid.