Ávžžuhusat beassášgussiide geat bohtet Guovdageidnui

Ođastuvvon: 25.03.2021.

Dáppe sáhtát lohkat ráđđehusa beassášávžžuhusaid ja láhkaásahusmearriduvvon njuolggadusaid.Guovdageainnu suohkan hástá buot beassášgussiid váldit koronaiskosa.

Beassášvuonccečivga ja njoammil - Deaddil ja stuora govva ihtá

Ráđđehus lea mearridan ođđa našunála njoammueastadandoaimmaid mat gustojit duorastaga njukčamánu 25. beaivvi rájes, ja dassái ođđa mearrádus boahtá. Ráđđehus dahká ođđa árvvoštallama maŋemusat cuoŋománu 12. beaivvi.

Loga ráđđehusa ođđa našunála ávžžuhusaid ja láhkaásahusmearriduvvon njuolggadusaid dáppe.

Dáppe sáhtát lohkat ráđđehusa beassášluopmoávžžuhusaid (ođastuvvon 23.03.2021).

 

Guovdageainnu suohkanis ii leat duođaštuvvon njoammudávda, ja mii sávvat dieđusge ahte mii nagodit garvit dan beassážiid badjel maid. Dan dihte mii ávžžuhit buohkaid geat bohtet Guovdageidnui dáid beassážiid čuovvut daid njoammueastadanrávvagiid mat gusket dan suohkanii gos leat boahtime, unnimusat 10 beaivve dan rájes go ollet. Dat mearkkaša ovdamearkka dihte ahte jus dan suohkanis gos boađat ii ávžžuhuvvo guossástallat ja lea bággu atnit njálbmesuoji, de ávžžuhit mii ahte don čuovut daid njoammueastadanrávvagiid unnimusat daid 10 vuosttaš beivviid go leat Guovdageainnus.

 

Buohkat geat bohtet báikkiin gos lea alla njoammudeaddu ávžžuhuvvojit váldit koronaiskosa. Guovdageainnu suohkan fállá vejolašvuođa váldit johtilisiskosa.

Koronaiskkusdiimmu diŋgot telefovnna bokte go riŋget doaktárkantuvrii Guovdageainnu dearvvašvuođaguovddážis. Telefovdna nummár lea 78 48 72 60. Diŋgonáiggit leat mánnodagas bearjadahkii dii. 08:30-11:15 ja 12:00-15:00.

Beassážiid, go leat bassebeaivvit, sáhtát riŋget dán telefovdna nummárii 413 92 709 gaskal dii. 08:00-20:00, go áiggut diŋgot koronaiskkusdiimmu.

 

Fylkkadoavttir lea maid buktán buori rávvagiid beassášluomu oktavuođas. Loga rávvagiid dáppe.

 

 

Ođđa našunála njoammueastadandoaibmabijut

Ođđa ávžžuhusat

  • Mehter šaddá dál guokte-mehteriin. Doala 2 mehter gaskka earáide go lea vejolaš, earret sis geaiguin orut fárrolaga, du moarsis/irggis dahje 1-2 fásta oktavuođaiguin jus orut akto. Dát ii guoskka dearvvašvuođabálvalusaide, mánáidgárddiide ja skuvllaide, dahje eará hearkkes joavkkuid bálvalusaide gos praktihkalaččat hehtte dábálaš doaimma bálvalusas.
  • Mii ávžžuhit eanemusat guokte guossi ruovttus.
  • Idjadanguossástallan ii leat ávžžuhuvvon jus boađat báikkis gos lea olu njoammun ja čavges doaibmabijut. Mánát ja nuorat geat leat vuollel 20 jagi boarrásat ja sii geat orrot akto sáhttet váldit 1-2 fásta olbmá idjadanguossin.
  • Berret rádjet sosiála oktavuođaid nu olu go vejolaš.
  • Mii ávžžuhit atnit njálbmesuoji buot báikkiin gos ii leat vejolaš doalahit 2 mehter gaskka.
  • Mii ávžžuhit olbmuid dušše gávppašit gávpeguovddážiin ja rámbuvrrain iežas ruovttusuohkanis. Dat mearkkaša ahte eat ávžžut vuolgit Áltái ja/dahje Romsii shoppentuvrii.
  • Mii ávžžuhit ahte buot dárbbatmeahttun mátkkošteapmi maŋiduvvo, earret:
    • Mátkkošteapmi bargui go ii leat vejolaš bargat ruovttukantuvrras.
    • Mátkkošteapmi ruoktot bearraša lusa, go studeanttas ii leat bearaš doppe gos studere.
    • Mátkkošteapmi hyhttai singuin geaiguin orut fárrolaga.
  • Lea ovdagihtii mearriduvvon ahte galgá leat digitála oahpahus universitehtain, allaskuvllain ja fágaskuvllain cuoŋománu 6. beaivvi rájes. Dát sirdojuvvo njukčamánu 25. beaivái.

Ođđa našunála láhkaásahusmearriduvvon njuolggadusat

  • Alkohola dárjudeapmi gildojuvvo olles Norggas.
  • Šaddá gielddus lágidit organiserejuvvon faláštallan- ja astoáiggeaktivitehtaid rávisolbmuide, earret profeššunealla váldofaláštalliide. Astoáiggeaktivitehtain oaivvilduvvo organiserejuvvon hárjehallamat, koaraid hárjehallamat ja geahččaleamit, korpsa ja teáhter.
  • Hárjehallanguovddážat sáhttet dollot rabasin sidjiide geat orrot suohkanis.
  • Vuojadanhállat, hoteallabasseaŋŋat ja sullasaččat galget leat gitta.
  • Bargoaddi galgá sihkkarastit ahte bargit barget ruovttukantuvrrain dain bargosajiin gos lea praktihkalaččat vejolaš.
  • Olbmot geat máhccet Norgii dárbbatmeahttun olgoriika mátkkošteami maŋŋel fertejit orrut errenhoteallas olles errenáiggi. Dát gusto mánnodaga njukčamánu 29. beaivvi gaskaija rájes. 
  • Mii ávžžuhit ahte buot plánejuvvon doalut šluhttejuvvojit. Jus doaluid ii sáhte maŋidit, gustojit dát njuolggadusat:
    • Viessodoaluin lea lohpi 10 olbmo, muhto aŋkke 20 olbmo jus leat fásta, mearriduvvon čohkkánsajit.
    • Viessofaláštallandoaluin lea lohpi 50 olbmo, olbmuide geat leat vuollel 20 jagi boarrásat ja go gullet faláštallanjovkui seammá suohkanis.
    • Olgodoaluin lea dušše lohpi 50 olbmo.
    • Lea lohpi 50 olbmo hávdádemiin go leat fásta, mearriduvvon sajit.