Nugo eanas eará suohkaniin davvin de boahtá skábmamánnu leahkit dat mánnu goas min luhtte maid njoammun leavai eanemus olles pandemiijas. Otnáš rádjái dán mánus leat Guovdageainnus leamaš 20 njoammuma. Dat mii lea positiiva lea ahte mii dovdat buot njoammungeainnuid.

Ikte bođi diehtu ahte guovtti mánnái lea njommon covid-19, okta nuppi klássas ja nubbi goalmmát klássas. Goappašagat leaba lagasoktavuođat dan mánnái geas mannán vahkku duođaštuvvui njoammun. Dasa lassin lei okta rávisolmmoš gii lei Álttás leamaš ožžon dávdamearkat ja gii ikte válddi positiiva iskosa.

Odne lea okta rávisolmmoš gii lea Oslos leamaš testen positiiva. Dan seamma lea okta rávisolmmoš geas lea lagasoktavuohta dakkárii geas ovdal lea duođaštuvvon covid-19.