Denne artikkelen er over 1 år gammel og kan inneholde utdatert informasjon
Čáhcebálvalus, huksenáššit, opmodatmihtidanbálvalus ja meahcástanbálvalus. Buot diet barggut ja bálvalusat gullet suohkana teknihkalaš ovttadahkii. Muhto dohko gal gullet olu eará maid, ja daid lea ge suohkanjođiheaddji ja su bargoveahka bidjon ovddasvástidit.
Almmuhuvvon 10.06.2018 00.33
Maŋemusat rievdaduvvon 20.12.2018 10.30
Sindre Murud
Aslak Mikal Mienna
Teknihkalaš ovttadaga suohkanjođiheaddji Sindre Murud
Murud lea leamaš suohkanjođiheaddji teknihkalaš ovttadagas suoidnemánu 2015 rájes. Ovdal dan son lei sekšuvdnahoavda NAV hálddahussekšuvnnas Romssa ja Finnmárkku kantuvrras ja sus lea maid máŋga jagaš duogáš jođiheaddjin Guovdageainnu NAV kantuvrras. Murud lea maid bargan seniorráđđeaddin HR-oasis Biebmobearráigeahčus ja lea maid bargan áššemeannudeaddjin NAVas 10 jagi.
Sus lea huksehus- ja rusttetinšenevra vuođđooahppun alibut dásis, ja lea maŋŋel dán vel ollašuhttán iežas alladássát oahpu 3 jagi guhkes ekonomiija- ja jođihanoahpuin.
Ovttadaga máŋga barggu
Teknihkalaš ovttadaga barggut leat máŋga. Dá leat bálvalusat ja barggut maid teknihkalaš ovttadat ovddasvástida:
- Čáhcebálvalus
- Duolvačáhci ja bázahus
- Doaimmahit ja áimmahuššat suohkanlaš vistiid ja opmodagaid
- Čorgen-/bassanbálvalus
- Viessohoaiddárbálvalus
- Huksenáššiid áššemeannudeapmi
- Opmodatmihtidanbálvalus
- Matrihkalčállin
- Kárta/GIS
- Areálahálddašeapmi (suohkanplánat, regulerenplánat ja dispensašuvdnaáššit)
- Buollinsuodjalus
- Suohkanlaš luottat ja sajit/báikkit
- Johtolatsihkkarvuohta
- Durddideapmi
- Čorgen
- Meahcástanbálvalus oktan vuodjinlobihálddašeapmi
- Eanadoallobálvalus
- Birassuodjalanbálvalus
- Šibitdoavttirbálvalus
Ovttadat doaibma čállin plánalávdegottis, eanadoallolávdegottis, meahcástanlávdegottis ja boazodoallolávdegottis. Áŋgiruššansuorggit 2018 leat digitaliseren/beavttálmahttin, sámegiella, unnidit buozalmasvuođa ja bargobiras.
Gulahallandieđut teknihkalaš ovttadahkki, bargit ovttadagas