Min prošeakta “Ruoktu mu váimmus” lea ožžon 1 150 000 ruvdnosaš doarjaga. Dát duođašta ahte dárbbašuvvojit ássandoaimmat mat leat heivehuvvon sámi kultuvrii, gillii ja eallinvuohkái.
Ásodatprošeakta mas lea sámi kultuvra vuođđun
Prošeavtta vuolggasadjin lea ahte olu vuorrásat ja olbmot geain lea vuoliduvvon doaibmanákca orrot ásodagain mat eai leat heivehuvvon sidjiide ja mat eai leat almmolaš bálvalusaid lahka. Seammás lea ruoktu eambbo go dušše viessu - dat lea eallinvuođđu ja kulturguoddi. Ruovttus lea dávjá duodjelatnja, lávvu, áiti, olgošillju heivehuvvon sámi eallinvuohkái ja eará mii lea erenoamáš sámi kultuvrii. Lea hástaleaddji fárret iežas ruovttus eret ja dat sáhttá vásihuvvot dego livččii identitehta massimin.
"Ruoktu mu váimmus" bokte háliida suohkan ovdánahttit ásodatkonseapttaid mat addet vejolašvuođa orrut oadjebasat ruovttus nu guhká go vejolaš, ásodagain mat leat heivehuvvon vuorasvuhtii ja doaibmanávcca ektui ja mat vuhtiiváldet sámi árbevieruid ja eallinvugiid. Dát mielddisbuktá buoret eallinárvvu, unnit oktonasvuođa ja eanet iešheanálašvuođa, seammás go dat nanne sámi giela ja kulturárbbi.
Našunálalaš ja báikkálaš ulbmiliid mielde
Prošeakta čuovvu sihke Sámedikki strategiija vuorrásiidda ja Ráđđehusa reforpma «Bo trygt hjemme», mat galget áimmahuššat ahte vuorrásat sáhttet orrut guhkit ruovttus oadjebas birrasis ja ahte dárbu dearvvašvuođa- ja fuolahusbálvalusaide maŋiduvvo. Prošeakta čuovvu maid suohkana iežas mihttomeari ovddidit vuorrásiidda servvodaga gos lea buorre ja oadjebas ássanbiras.
«Ruoktu mu váimmus» bokte galgá suohkana ássandilálašvuohta vuđolaččat kártejuvvot ja dan vuođul hábmehuvvojit ásodatkonseapttat main leat vuođđun sámi ássanvuogit.
Stuorát ásodatpolitihkalaš áŋgiruššan
Guovdageainnu suohkan lea daid maŋimuš jagiid nannen iežas ásodatsosiála áŋgiruššama. Suohkan lea ásahan ásodatkantuvrra, geavahan eanet álggahanloana vai olbmot sáhttet oastit, hukset, ođastit, heivehit ja bisuhit ásodaga ja dasto lea vel prošeakta "Láigoheames eaiggáduššamii" boađi boađi.
Ásodatkantuvra fállá buot suohkana ássiide veahki ja bagadallama ásodatsosiála áššiiguin. Ásodatkantuvrras lea maid ovddasvástádus koordineret suohkana ásodatsosiála doaimmaid ja lea ge leamaš guovddážis “Ruoktu mu váimmus” prošeavtta ovddideamis.
Prošeavtta bohtosat šaddet deaŧalaččat ollislaš ásodatpolitihkalaš plána hábmemis, mii galgá boahtit dálá ásodatsosiálalaš doaibmaplána sadjái.
Innovašuvdna boaittobealbáikkiin
Viessobáŋku oaččui dán jagi 129 doarjjaohcama viessodoaibmabijuide, main 47 guske boaittobealbáikki suohkaniidda. Leat 25 prošeavtta mat ožžot doarjaga. Ulbmil doarjagiin lea ovddidit ođđa ásodatkonseaptaid ja ovttasbargovugiid mat sáhttet hábmet eambbo heivvolaš ásodagaid boaittobealábikkiide.
Guovdageainnu suohkan lea rámis go lea daid searvvis geat leat válljejuvvon ja illuda juogadit vásáhusaid ja máhtu eará suohkaniiguin geat leat seamma dilis.