Šiehtadus galgá sihkkarastit buori ovttasdoaibmama suohkana ja sanitehtasearvvi fuolahusgearggusvuođa pandemiijaid, stuorát lihkohisvuođaid ja roasuid oktavuođas.

Šiehtadusa leaba sátnejođiheaddji Anders J. Buljo ja Guovdageainnu Sanitehtasearvvi jođiheaddji, Kristine Julie Eira vuolláičállán. Dat čalmmustahttá movt searvvi eaktodáhtolaš bargit sáhttet veahkehit suohkana dakkár bargguin go registreremiin, evakuerema oktavuođas, oapmahaččaid doarjagiin, borramušain ja fuolahusdoaimmain – fárrolaga suohkana heahtejođihangottiin.

- Mii atnit árvvus ovttasbarggu sanitehtaservviin. Sii ovddastit dehálaš eaktodáhtolaš návccaid báikegottis ja dagahit ahte mii leat nannoseappot go juoga dáhpáhuvvá, lohká sátnejođiheaddji Anders J. Buljo.

Šiehtadus lea áigodahkii 2025-2030 ja galgá árvvoštallojuvvot jahkásaččat gearggusvuođaráđis.