Guovdageainnu suohkan lea movttet juogadit iežas ássiidguin dan ođđasa ahte dál lea almmuhuvvon Guovdageidnui sierra ássiid-appa. Ássiid-appai galget čohkkejuvvot buot relevánta dieđut seamma vuogádahkii, ja galgá doaibmat dego gulahallankanálan sihke suohkana ja ássiid gaskkas, ja ássiid ja servviid gaskkas.
Olles suohkanii
Appa lea ođđa ja gelddolaš vuohki gulahallat ássiidguin, mainna dus earret eará lea vejolašvuohta oažžut “push-dieđu” njuolga iežat mátketelefuvdnii go suohkanis leat dehálaš dieđut ássiide, dahje jus servviin main don beroštat – leat ođđasat maid juogadit appas.
Appas don oaččut vejolašvuođa válljet justte daid surggiid main beroštat – nu go ovdamearkka dihte valáštallan ja kultuvra. Oaččut maid vejolašvuođa válljet servviid main beroštat, ja báikkiid suohkanis gos erenoamážit háliidat oažžut ođđasiid push-dieđu bokte.
Buoret ollislašgova fálaldagas
Dát ortnet addá vejolašvuođa buoret ollislašgovvii Guovdageainnu fálaldagas, go ulbmiliin lea čohkket ovtta appai visot dieđuid dan birra mii Guovdageainnu suohkanis fállojuvvo - ja maiddái mii Guovdageainnu suohkanis geavvá áiggis áigái.
Dat mearkkaša ahte ássiid-appas don gávnnat dieđuid earret eará dáid birra; čuoiganláhtuid, bearralmátkiid, hárjehallamiid, teahterčájálmasaid, iešguđetlágan kurššaid, duodjemárkaniid, beassášmárkaniid ja eará doaluid.
Appas lea hui rabas vejolašvuohta čohkket dieđuid justte dan birra maid Guovdageainnu suohkana ássit ja searvvit háliidit – ja dan dihte lea olu ássiid, servviid ja suohkana duohken nannet appa buorren reaidun buohkaide!
Eambbo oidnosii Guovdageainnu suohkana servviid
Nu go odne lea – de juhket olu searvvit dieđuid iežaset fálaldaga ja doaluid birra arenain nu go Facebook-ruovttusiidduin ja diehtojuohkintávvaliin. Dat sáhttá dagahit ahte vejolaš berošteaddjit dahje oasseváldit eai oaččo daid dieđuid maid dárbbašivččet, rievttes áigái, ja dan geažil manahit ovdamearkka dihte doaluid maidda livččet háliidan searvat.
Dán appas sáhttet buot searvvit ráhkadit sierra “konto”, ja dan bokte juohkit dieđuid iežaset fálaldagain ja doaluin. Dainna lágiin lea appa mielde oažžume Guovdageainnu servviid eambbo oidnosii.
Gulahallan suohkana ja ássiid gaskkas
Appa čađa sáhttá suohkanorganisašuvdna maid juohkit dehálaš dieđuid iežas ássiide. Jus ovdamearkka dihte leat revrebarggut mat dagahit ahte čázi fertejit steŋget muhttin báikkis suohkanis, de sáhttá suohkan njuolga appa čađa sáddet push-dieđu dan birra ássiide geaidda dat diehtu lea relevánta.
Ovttasbargu nuppástuhttinprográmmain – Ovddosin
Assiid-appa ásaheapmi lea ovttasbargu suohkana ja nuppástuhttinprográmma Ovddos gaskkas, ja lea Innocode gii ráhkada appa.
Álgojurdda ásahit deike sierra ássiid-appain vulggii prošeavttas maid nuppástuhttinprográmma lea bidjan johtui dainna ulbmiliin ahte nannet geasuheaddjivuođa Guovdageainnu orrunbáikkis. Ássiid-appa ásaheapmi lea okta golmma oasis dán prošeavttas – ja gullá oassái mas ulbmiliin lea láhčit dili dasa ahte ássiin galgá leat álki oažžut ollislašgova fálaldagas ja álki leat gávdnat dieđuid.
Oza Kautokeino innbygger App Store (direkte link) dahje Google Play’as (direkte link) iežat smarttelefuvnnas. Dahje govve QR-koda vulobealde.
