Manne lea Giellavahkku deaŧalaš?

Vaikko sámegielat leat áitojuvvon, de sámegielat ain bissot. Sámiid gaskkas lea dihtomielalašvuohta giela ja giellaválljema ektui, ja eanet ja eanet olbmot válljejit searvat kurssaide oažžun dihtii giela ruovttoluotta. Mii oaidnit ahte stuoraservodat sihke Norggas, Suomas ja Ruoŧas čájehit stuorit beroštumi ja áŋgiruššama sámegielaide, ja sápmelaččat dáin riikkain dovdet ahte sin kultuvra ja giella lea buoret muddui dohkkehuvvon. 
 

Giellavahkku lea veahkkálasbargu čalmmustahttit sámegielaid ja loktet máhtu daid birra olles servodagas. Priváhta ja almmolaš ásahusat, ealáhuseallin, organisašuvnnat ja eará aktevrrat bovdejuvvojit oainnusmahttit sámegielaid juste dán vahkus. Ovttas váldit mii stuorábuš ovddasvástádusa sámegielaid gullomis, oidnomis ja geavaheames buot servodatsurggiin.

Giellavahkku prográmma gávnnat Giellavahkku almmolašsiiddus..