Guovdageainnu suohkan ja Sámi allaskuvla vuolláičálle ođđa ovttasbargošiehtadusa cuoŋománu 21. beaivvi. Šiehtadus láhčá dili lagat ja eanet systemáhtalaš ovttasbargui gaskal suohkana ja allaskuvlla boahttevaš jagiid.

Šiehtadusa ulbmil lea nannet sámegiela, kultuvrra ja servodatovdáneami ja lasihit gelbbolašvuođa regiovnnas. Ovttasbargu galgá earret eará fátmmastit relevánta oahppofálaldagaid ovddideami, rekrutterema ja gelbbolašvuođaloktema suohkana bálvalusain, ja ovttasbarggu dutkamis ja innovašuvnnas.

Šiehtadus deattuha maid dan ahte Guovdageaidnu galgá leat geasuheaddji orrun-, studeren- ja bargobáikin. Dat mearkkaša earret eará buriid bálvalusaid, ásodatčovdosiid ja astoáigefálaldagaid sihke studeanttaide ja bargiide.

Ovttasbarggu čuovvoleapmái ásahuvvo ovttasbargojoavku mii vuoruha doaimmaid ja čuovvola šiehtadusa. Bealit áiguba maiddái ovttas ohcat olggobeale ruhtadeami ovdánahttinprošeavttaide.

Guovdageainnu suohkan oaidná šiehtadusa dehálaš vuođđun ovdánahttit bálvalusaid ja báikkálaš servodaga, ovttas Sámi allaskuvllain.

Šiehtadusa sáhtát lohkat dás. (PDF, 224 kB)