Njuolggadusat ássiid gažadanáigái suohkanstivračoahkkimis

Suohkanstivra mearrida vuolábealde njuolggadusaid ássiid gažadanáigái mat gustojit boahtte suohkanstivračoahkkima rájes.

Almmolaš gažadanáiggi njuolggadusat

  • Buohkat geat orrot Guovdageainnu suohkanis sáhttet divvut gažaldagaid sátnejođiheaddjái.
  • Suohkanstivrra lahtut ja várrelahtut eai sáhte ieža oassálastit gažadanboddui.
  • Gažaldagaid galgá čálalaččat sáddet sátnejođiheaddjái maŋemusat golbma beaivvi ovdal čoahkkima.
  • Gažadeaddji, dahje gažadeaddji sáttatolmmoš gii jearrá, ferte ieš leat sajis čoahkkimis vai gažaldat gieđahallojuvvo, muhto mearrida lohká go son ieš gažaldaga vai galgá go sátnejođiheaddji lohkat dan. Gažadeaddji dahje su sáttatolmmoš ferte goit leat sajis čoahkkimis go gažaldat divvojuvvo ja vástiduvvo. Jus lea guhkes mátki boahtit, de sáhttá gažadeaddji oassálastit telefovnnas/digitálalaččat.
  • Várrejuvvo gitta 30 minuhta almmolaš gažadanboddui ovdalgo suohkanstivrra čoahkkin almmolaččat álgá.
  • Gažaldagat eai oaččo leat komentára hámis.
  • Gažaldagat ja vástádusat galget leat oanehaččat ja eai badjel golbma minuhta, oktan duogáščilgehusain. Vástádusaáigi lea maid eanemusat golbma minuhta.
  • Sátnejođiheaddji vástida ieš dahje bivdá suohkanstivrra, suohkandirektevrra dahje eará bargi hálddahusas vástidit gažaldaga.
  • Gažadeaddji oažžu bivdit replihka ja sátnejođiheaddji dahje dat gii vástida sáhttá vástidit replihka. Addojuvvo 1 minuhta replihkkii ja replihka vástideapmái.
  • Gažaldagat maid ii sáhte vástidit dastánaga, maŋiduvvojit boahtte gažadanboddui.
  • Gažaldagat galget gustot suohkana diliide ja leat oppalaččat beroštahtti suohkana ássiide.
  • Persovnnalaš áššit ja áššit mat leat dábálaš váiddagieđahallamis, eai leat almmolaččat dahje maidda gusto jávohisvuođa geatnegasvuohta eai galgga loktejuvvot dás.
  • Ii leat vejolaš divvut gažaldagaid áššiide mat leat suohkanstivrra áššelisttus seammá beaivvi.
  • Suohkana virgáduvvon bargit eai oaččo divvut gažaldagaid mat gullet iežaset bargosadjái.
  • Sátnejođiheaddji mearrida njuolggadusaid dulkoma.
  • Sátnejođiheaddji sáhttá hilgut gažaldagaid mat eai leat siskkobealde njuolggadusaid.
  • Jus lea plánejuvvon suohkanstivračoahkkima sáddet njuolggosáttan radio/video bokte, de dát gusto maiddái gažadanboddui.

 

Suohkanstivrra mearrádusa sáhtát lohkat dás (PDF, 110 kB)

 

Gažaldaga sáhtát sáddet suohkana e-bostii: e-post@kautokeino.kommune.no