Iskkadeapmi galgá addit suohkanii buoret vuođu plánet boahttevaš orrunčovdosiid, ovddidit ásodatdoaimmaid ja nannet ásodatsosiála barggu. Dehálaš oassi dan kártemis lea maid oažžut buoret ipmárdusa makkár viessodárbbut leat čatnon sámi kultuvrii, árbevieruide ja orrun vuohkái. Mađi eanet olbmot geat juogadit iežaset vásáhusaid ja oaiviliid, dađi buoret vuođu oažžu suohkan.
Du vástádusat leat dehálaččat
Ásodat lea dehálaš oassi beaivválaš eallimis ja váikkuha sihke loaktimii, dearvvašvuhtii ja vejolašvuhtii joatkit orrut suohkanis iešguđetlágan eallindilálašvuođain.
Danne háliidit gullat oaiviliid sihke nuorain ja boarrásiin, ásodateaiggádiin ja láigoheaddjiin, bearrašiin, ovttaskasolbmuin ja earáin geat orrot Guovdageainnus.
Midjiide lea dehálaš diehtit makkár dárbbut leat čadnon vissui ja orrundillái go lea sáhka sámi arvvuin ja árbevieruin. Dát sáhttá ovdamearkka dihte leat dárbu duddjon sadjái, biergasiid ja fievrruid vurkemii, árbevirolaš biepmuid gieđahallamii dahje vejolašvuohta čohkket máŋga buolvva seamma báikái.
Iskkadeamis jearrat mii earret eará:
- Movt don orut odne
- Gokčá go ásodat du dárbbuid
- Vejolašvuođat oastit, hukset dahje láigohit ásodaga
- Boahttevaš sávaldagaid ja dárbbuid orruma dáfus
- Ásodaga heiveheami birra
- Mii lea deháleamos vai sáhtát eallit sámi árvvuid ja árbevieruid mielde
Iskkadeapmi lea anonyma
Buot vástádusat gieđahallojuvvojit anonymalaččat, iige leat vejolaš identifiseret ovttaskas olbmuid bohtosiin.
Vástideapmi váldá sullii 10 minuhtta.
Searvva skeaŋkkakoartta vuorbádeapmái
Giitun go searvvat iskkadeapmái, vuorbádit mii golbma skeaŋkkakoartta á 1 000 ruvnnu. Skeaŋkkakoarttat sáhttet geavahuvvot iešválljejuvvon gávppis Guovdageainnu suohkanis.
Dieđut das movt sáhtát searvat vuorbádeapmái, bohtet maŋŋel go leat sádden vástádusaid.
Veahket min plánet boahtteáiggi ássandili Guovdageainnus
Mađi eanet olbmot servet, dađi buoret vuođu oažžu suohkan ovdánahttit ásodatfálaldagaid mat vástidit ássiid dárbbuide – sihke odne ja boahtteáiggis.
Mii sávvat ahte válddát áiggi vástidit iskkadeapmái.
Vástit ássiidiskkadeami dán liŋka bokte