Guovdageainnu suohkan lea virgádan Anna Margrethe Bæhr Hætta rektorin Guovdageainnu skuvlii, ja mii sávvat sutnje bures boahtima bargin Guovdageainnu suohkanii ja lihku bargguin.

Bæhr Hættas lea oahpaheaddjioahppu, sus lea mastergráda 5.-10 ceahke vuođđoskuvlaoahpus ja jođihanoahppu. Son bargá oahppojođiheaddjin oahpaheaddjeoahpus Sámi allaskuvllas ja álgá doaibmat rektorin 01.08.21.

Anna M. B. Hætta (41) lohka ieš ná vejolašvuođa birra:

Dát lea oba stuora ovddasvástádus ja deaŧalaš virgi, man háliidan váldit vuostá. Anan gudnin dan go munnje lea fállon rektorvirgi Sámi stuorimus skuvllas čavčča rájes. Háliidivččen veahkkálagaid skuvlla bargiiguin olahit ahte ođđa skuvla šaddá buorren ja ahte das lea buorre kvalitehta. Háliidivččen maid ahte skuvla galgá lea geasuheaddji báikin buohkaide.

Guovdageainnu suohkana Kultur- ja bajásšaddanovttadaga suohkanjođiheaddji, Bodil Utsi Vars:

Mis lea luohttámuš ahte dat ođđa rektor nagoda čađahit skuvllaid ovttastahttima ja jođihit oahpahusáššiid nu ahte lea dat buot buoremus juohke oahppi ektui, danne go sus lea nanu oahppu, buorre bargohárjáneapmi ja bargovásáhusat.

Gulahallanolbmot:

Anna Margrethe B. Hætta, tlf: 916 28 016

Bodil Utsi Vars, tlf: 920 30 212