Guovdageainnu suohkanis lea leamaš luohti 1987 rájes. Guovdageainnu Kulturstivra doalai gilvvu, háhkan dihte luođi suohkanii. Gilvvu vuoiti lei Johan Anders M. Eira iežas luđiin máid ráhkadii suohkanii, mannjel álbmotjienasteami máid Kulturstivra lei čađahan. Muhto suohkanstivra mearridii ahte Guovdageainnu suohkan ii dárbbat luođi.

1987 rájes lea luohti eambbo dohkkehuvvon, ja lea olu ealáskan, sihke nuoraid gáskás ja muđui sámi álbmogis. Luohti lea sámi kulturárbi, ja suohkan áigu dál luođi loktet ja seammás leat kulturguoddi sámi árbevieruide. Guovdageainnu suohkana višuvdna lea Ofelaš Sámis, ja go galgá olahit višuvnna ja deavdit oasi das, de berret gavnnjaid sihkkut min suohkanluođis ja atnit dan dain oktavuođain go mii ovdanbuktit min suohkana olgguldasat.

Dál go luohti lea eambbo dohkkehuvvon sihke kulturguoddin ja sámi musihkkan, de lea dan oktavuođas áigi láddan loktet oidnosii luođi man suohkana álbmot válljii suohkanluohtin 1987:s. Kulturstivra doarjjui álbmoga válljema, muhto suohkanstivrra mielas dalle ii dárbbašuvvon sierra suohkanluohti.

Dál 2022:s lea fas suohkanstivra meannudan ášši ja dohkkehan suohkanluođi min suohkana suohkanluohtin, ja dál lea suohkanis sierra luohti. Dat luohti máid Johan Anders M. Eira ráhkadii Guovdageainnu suohkanii 1987:s.

Luohti boahtá almmuhuvvot suohkana ruovttusiiddus oktan govaiguin mat leat váldon min suohkanis.