Suohkanstivra ii dohkkehan jahkerehketdoalu 2022 ovdal 2023 juovlamánu. Duogáš dasa lea go suohkana dárkkistanfitnodagas ledje dihtorsisabahkkemat 2023 giđa, ja danne ii sáhttán dárkkistit suohkana jahkerehketdoalu ovdal 2023 čavčča.

12.10.2023 oaččui Guovdageainnu suohkan revišuvdnaraportta, ja suohkanstivra meannudii jahkerehketdoalu ja jahkeraportta nuppádassii 2023 juovlamánu. Dalá maŋŋá čoahkkima dat sáddejuvvojedje Stáhtahálddašeaddjái. Suohkan- ja ođasmahttindepartemeanta lea atnán suohkanlága § 28-1, vuosttaš lađas, bustávva F vuođđun go lea dieđihan suohkana ROBEKai. 

Suohkanstivra gieđahalai jahkerehketdoalu ja jahkeraportta 2023 geassemánus nu mo láhka geatnegahttá, muhto ii lean vejolaš gieđahallat ášši ollislaččat go ii lean gárvves revišuvdnaraporta.

Stáhtahálddašeaddji čađahii árvvoštallama 19.12.2023 mas sii rávvejedje ahte dat 6 suohkana maidda revišuvnna dihtorsisabahkkemat guske, eai galgga biddjot ROBEK-listui dán vuođul. Suohkan- ja ođasmahttindepartemeanta lea dattetge válljen bidjat Guovdageainnu suohkana hálddahusa vuollái danne go 2022 jahkerehketdoallu lea sáddejuvvon beare maŋŋit. Dieđiheapmi ROBEK-listui ja dan olggosčáliheapmái dahkko dábálaččat guktii jagis.