Guovdageainnu suohkan lea olahan buriid bohtosiid 2026 suohkanbaromehtaris, earret eará sosiálafálaldagain, dearvvašvuođabálvalusain ja mánáidgárddiin. Seammás čájehit logut ahte suohkanis leat hástalusat erenoamážit vuođđoskuvllas ja dikšun- ja fuolaheami ovttodagas.

Suohkanbaromehtera maid Kommunal Rapport ráhkada buohtastahttá máŋga bálvalussuorggi ja čoavddaloguid Norgga suohkaniin. Obbalaš rangeremis 2026as lea Guovdageaidnu 287. sajis.

30 buoremusa gaskkas golmma suorggis

Suohkan lea 25. sajis sosiálafuolahusa dáfus olles Norggas. Okta ágga go dán suorggis manná bures lea ahte ássit ožžot sosiálaveahki oalle jođánit.

Maiddái dearvvašvuođabálvalusat suohkanis leat hui buorit. Suohkanis lea buorre doavttirfálaldat, ja buot fástadoaktárlisttuin leat fástadoaktárat. Guovdageainnus lea maiddái buorre jorttamorafálaldat ja ruovttufitnan easkka riegádan mánáid ektui. Guovdageaidnu lea 27. sajis riikadáfus dáin bálvalusain. 

Mánáidgárddiid dáfus lea suohkan 29. sajis. Buot suohkana mánáidgárddit devdet pedagogalaš norpmaid almmá spiehkastemiid haga. Kultuvra boahtá maid oalle bajas eará suohkaniid ektui, 76. sajis.

Suohkanbaromehter čájeha seammás surggiid main suohkanis lea buoridanmunni.

Vuođđoskuvla ja dikšun ja fuolaheapmi leat vuolemusas nationála rangeremis. Earret eará gesset vuođđoskuvllas oahppanbohtosat ja oahpaheaddjegelbbolašvuohta vulos bohtosiid.

Ja fuolaheami oktavuođas guoská dát earret eará bargiide geain lea fágaoahppu ja veahkkedoaibmafálaldat demeansabuhcciide geat orrot ruovttus.

- Suohkanbaromehter čájeha ahte Guovdageainnu suohkan addá hui buriid bálvalusaid máŋgga dehálaš suorggis. Dat ahte mii leat riikka 30 buoremusaid searvvis mii guoská sosiálafálaldahkii, dearvvašvuođabálvalusaide ja mánáidgárddiide, lea juoga mainna mii galgat leat rámis. Dat čájeha ahte buot suohkana bargit leat bargan hui áŋgirit, lohká suohkandirektevra Karin Hætta.

- Bohtosat čájehit maiddái čielgasit gos mis leat hástalusat. Daid eat galgga duššin atnit. Mii fertet vuhtiiváldit dáid dieđuid ja geahčadit mii loguid duohken lea, ja gokko mii sáhttit buoridit iežamet bálvalusaid, dadjá suohkandirektevra.

Iešguđetlágan iskkadeamit mihtidit iešguđet beliid

Suohkanbaromehter lea okta máŋgga guorahallamis mii buohtastahtte Norgga suohkaniid. Bohtosiid ferte geahččat dan ektui maid ovttaskas iskkadeapmi mihtida.

2026 Suohkanindeaksas, maid Agenda Kaupang lea ráhkadan, lea Guovdageaidnu 326. sajis. Suohkanindeaksa árvvoštallá suohkaniid kvalitehta bálvalusain , gollodási ja ekonomalaš diliid vuođul, ja erenoamážit gollo- ja finánsalogut gesset Guovdageainnu vulos.

Suohkanbaromehter ja suohkanindeavssas leat guokte iešguđetlágan mihtut, ja daid ii sáhte njuolga buohtastahttit.

Guovdageainnu sajit Suohkanbaromehteris 2026:

Sosiálabálvalus: 25. sajis

Dearvvašvuohta: 27. sajis

Mánáidgárdi: 29. sajis

Kultuvra: 76. sajis

Ekonomiija: 295. sajis

Vuođđoskuvla: 295. sajis

Fuolahus: 338. sajis