Guovdageainnu suohkan ja Finnmárkku politiijaguovlu leat dál formaliseren ođastuvvon ja nannejuvvon ovttasbarggu ođđa ovttasbargošiehtadusa bokte. Šiehtadus čielggasmahttá oktasaš ovddasvástádusa dorvvolaš báikegottiid ovddideames ja nanne struktuvrra mii lea oaivvilduvvon eastadit rihkolašvuođa, gearggusvuođa ja bálvalusaid ovttasdoaibmama.

Šiehtadus deattuha erenoamážit: buori diehtojuohkima, árra áŋgiruššama hearkkes joavkkuid ektui ja lagas ovttasbarggu gaskal politiija, skuvlla, mánáidsuodjalusa, dearvvašvuođa- ja fuolahusbálvalusaid ja eará ossodagaid suohkanis. Politiija geatnegahttojuvvo earret eará boahtit oidnosii, jođánit vástidit go lea dárbu veahkkái ja bidjat návccaid kriminalitehta eastadeaddji bargguide ja Politiijaráđđái. Suohkan gis galgá sihkkarastit buriid ovttasbargostruktuvrraid, láhčit dili árra áŋgiruššamii ja fuolahit čielga rutiinnaid diehtojuohkimis ja heahtedili meannudeamis.

Ovttasbargu galgá maid nannet báikkálaš gearggusvuođaproseassaid. Stuorát dáhpáhusaid dahje roasu oktavuođas galget bealit sihkkarastit beaktilis oktiiordnema, jođánis dieđiheami ja buori doarjaga ássiide. Šiehtadus deattuha ahte politiijain Guovdageainnus galgá leat buorre máhttu sámi gielas ja kultuvrras.

- Dát šiehtadus addá midjiide vel buoret vuođu bargat vuogádatlaččat ja ulbmillaččat oadjebasvuođa ja eastadeami ovdii Guovdageainnus. Dat vuođđuduvvo buori ovttasbargui ollu jagiid badjel ja bidjá čielga rámmaid dasa movt mii ovttas galgat dustet hástalusaid boahtteáiggis, dadjá sátnejođiheaddji.

Šiehtadus doaibmagoahtá dalán ja dat galgá evaluerejuvvot juohke jagi Politiijaráđis.

Dáppe sáhtat lohkat šiehtadusa  (PDF, 211 kB)