Otná suohkanstivračoahkkimis gudnejahttojuvvo Guovdageainnu dáiddárat, geat leat olahan nationála ja riikkaidgaskasaš beaggima.

Sáhkavuorustis ovdanbuvttii sátnejođiheaddji man dehálaš kultuvra lea giela, identitehta, demokratiija ja ealáhusovdáneami ektui.

Guovdageaidnu lea dat suohkan riikkas gos leat eanemus dáiddárat juohke ássi nammii, Norsk kulturindeks muitala. 2017 rájes lea suohkan leamaš buot bajimusas - ja 2024is lei 1. sajis. Dat deattuha dan nana dáiddalaš sajádaga mii suohkanis lea nationálalaččat.

- Eai goassege ovdal leat nu ollu Guovdageainnu dáiddárat olahan nu alla dási nationálalaččat ja riikkaidgaskasaččat. Dát eai leat ovttaskas olahusat, muhto kulturfápmu mii lea jođus, dajai sátnejođiheaddji.

Gudnejahttin lei maid čadnojuvvon suohkana servodatplánii, gos kultuvra, giella ja hutkás ealáhusat čalmmustahttojuvvojit viidáset ovdáneami vuođđun.

Sátnejođiheaddji deattuhii ahte dát olahus ii leat dáhpedorpmis boahtán, muhto huksejuvvon viiddis kulturbirrasa - eaktodáhtolaš servviin ja ásahusain nugo Sámi Musihkkafestiválas, Riikkaidgaskasaš Sámi Filbmainstituhtas ja Beaivváš Sámi Našunálateáhteris vehkiin. Maiddái nuoraidbargu ja rekrutterenarenat nugo Lounge Sápmi loktejuvvui dehálažžan boahttevaš dáiddáriidda.

Dáiddadállu čalmmustuvvui guovddáš fápmoguovddážin ođđaáigásaš sámi dáiddaovdáneamis, ja deaŧalaš aktevran nationála áŋgiruššamiin sámi dáidaga ja hutkás ealáhusaid ektui.

Loahpas giittii sátnejođiheaddji dáiddáriid olles suohkana ovddas:

- Dii guoddibehtet Sámi ođđa báikkiide. Dii guoddibehtet Guovdageainnu máilbmái. Ja dan dihte mii leat hui rámis.

Dáiddárat geat gudnejahttojuvvojedje:

• Máret Ánne Sara
• Elle Sofe Sara
• Sara Margrethe Oskal
• Ken Are Bongo
• Elle Márjá Eira
• Per-Josef Idivuoma
• Lisa Marie Kristensen
• Rawdna Carita Eira
• Hilde Skancke Pedersen
• Åse Kathrin Vuolab
• Anthoni Hætta
• Inger Johanne Oskal

Dáppe sáhtát lohkat sátnejođiheaddji giitossártni. (PDF, 258 kB)