Gonagasas Haraldas lea leamaš stuorra mearkkašupmi sámi servodahkii ja son čájehii doaimmastis ahte son gudnejahtii sámi kultuvrra ja identitehta. Son finai maid Guovdageainnus, sihke ruvdnaprinsan ja gonagassan, máŋgasiin dáppe leat danin iežaset muittut deaivvademiin suinna ja gonagasbearrašiin.

- Gonagas Harald deaivvai olbmuid miehtá riikka liekkusvuođain, árvvusatnimiin ja stuora beroštumiin. Ollugat dáppe muittašit su beroštumi sámi gillii, kultuvrii ja servodateallimii. Guovdageainnu suohkana bealis mun háliidan dovddahit iežamet oassádallama gonagasbearrašii, lohká sátnejođiheaddji Anders S. Buljo.

Guovdageainnu suohkan čalmmustahttá našunála morraša go levget beallestákkus Guovdageainnu dearvvašvuođaguovddážis, Máze skuvllas ja Máze ássan- ja fuolahusviesu olggobealde. Guovdageainnu girku girkobiellut čudjet odne gaskal diibmu 12:00 ja 13:00 gonagasa jápmima oktavuođas.

Suohkanviesus bálvaluskantuvrras ja Máze bajásšaddanguovddážii lea bidjun kondolánsaprotokolla ássiide geat háliidit čájehit iežaset oassádallama ja čállit maŋemus dearvvuođaid. Kondolánsaprotokollai sáhttá čállit árgabeivviid gaskal dii. 09:00-15:00 gitta gonagas hávdáduvvo.