Maid son heive odne čállit go lea maŋemus bargobeaivi dán jagáš giellavahkus? Lean čállán amas sáni birra, ipmárduserohusaid gielaid gaskkas, gulahallat sámegielain ja maid sámegiela geavaheapmi mearkkaša.

Juo! Mun dieđán mii otná sáhka sáhttá leat. Oktii deaivvadeigga oarjjabeale olmmoš ja nuorttabeale olmmoš muhtun olgobáikkis. Soai dearvvaheigga. Oarjjabeale olbmo namma lei Niillas ja nuorttabeale olbmo ges Ánde. Humadeigga ilmmiid dáliid nugo dálkki birra, geat soai leaba, makkár sogaide gullaba. Eará sániiguin; áibbas DÁBÁLAŠ ságaid. 

Niillas jearralastá Ánddes “gillát go vázzilit báras ja oasttestit munnuide vuollaga?”

Ánde vástida dalánaga “Ii mun dan gal viša.”

Niillas jurdilastá, maid leago dát olmmái nu udju, ii obage roahkat oastit munnuide vuollaga goabbáige?

-“Na... manin bat don it viša oastit vuollagiid munnuide?”, imaštallamiin jearrala Niillas.

-“Ii mun dan gal viša, daga ieš dan”, vástida Ánde.

-“Mun jurdilin go don leat nuorat olmmoš, don leat searabut ja falibut go mun”, Niillas geažuha.

-“Dan gal in viša, daga ieš”, sovkala Ánde ruovttoluotta.

-“Ii hal dás leat eará go vázzilit báras oastime vuollaga” hárbmasit muoláda Niillas ja vázzila báraolbmá lusa.

-“Vuovdil munnje guokte vuollaga. Diet mu olmmái Ánde, ii gal viša ieš oastit maidege”, Niillas bohkosa, seammás go dan dadjá.

Báraolmmái, guhte lei nai nuorttabeale olmmoš, moddjesta ja muitala Niillasii. “ Dál gal ipmirdan leat boastut. Son oaivvilda son ii gille dudnuide oastit vuollaga. Ii son heađisge leat njáigu dahje udju."

Ii leat ártet ja imaš go vel suopmanerohusat nai sáhttet dagahit riidduid, boasttuipmárdusaid ja vaikko vel doarrumiid vel.

Guovdageainnu suohkana giellakonsuleanta