Dat orro gal nu diehttelas, ja lea go namuhanveara ge?

Geaidnu ollet dohko, ahte ruovttusiidu lea gárvvis ja ahte sámegiella lea váldogiella das, lea mohkkás ja guhkki. Ollu gerddiid doaivu olmmoš ahte okta váttisvuohta lea čovdon, muhto čájehuvvo ahte ferte mannat ruovttoluotta, máŋgga geardde, ovdal go gávdná doallevaš čovdosa.

Sámegielat čovdosiid ii sáhte dušše dohppet hildus. Dat mii lea gárvvisin láhččojuvvon ovttagielat dárogielat suohkanii, dan ferte sámegielat suohkan ieš hutkat, čállit, jorgalit ja heivehit nu ahte šaddá buorre ja ávkkálaš ruovttusiidu. Dat bargu lea jođus čađat, ja go bohtet ođasteamit ja rievdadusat, de ferte vuot hutkat ja jorgalit ja heivehit, go ii leat gárvvis lágideaddji bealis.

Dán ruovttusiiddus leat ollu čovdosat máid suohkan lea ieš jorgalan davvisámegillii. Dat leat earret eará elektrovnnalaš skovit, chatbot (mášiidna mii ipmirda vissis jearaldagaid) ja bálvalus ránnjájoavku.