Máid son dat mearkkaša?

Dat lea ávžžuhus midjiide buohkaide ahte vázzit hui veahá eambbo. 

Guovdageainnu suohkan lea miellahttu Finnmárkku Olggostallanráđis, ja eanemus dovddus sin doaimmain lea várra bearralmohkki / perletur. Guovdageainnus leat dán bievllas 24 oanehit ja guhkit mohkit máid olbmot sáhttet vázzit. Ja váikko dál lea dat čálus muohttaga vuolde, de lea goitge ávžžuhus birra jagi, ahte vázzit ja veahá lihkadit. 

Bearralmohkit Guovdageainnu suohkanis leat earret eará Geađgevárri, Bealjážat, Skierrejeaggi, Biggeskáidi, Bojačorru, Ádjet. Go atnit daid namaid mat gullet guovlluide, eat ge hutkka ođđa namaid daid mohkiid dihte, de seailluhit ja oahpahit báikenamaid earáide geat eai leat nu oahppásat daidda.

Váccát go? Na, dieđusge!