Čoavjebávččas, maiddai gohčoduvvon golgodávda, lea dávjjimusat norovirusa dihte. Norovirus leavvá jođánit ja njoammu álkit olbmos olbmui doppe gos ollu olbmot čoahkkanit dahje orrot čoahkis.

Olbmot buot ahkejoavkkuin sáhttet buohccát. Dábálaččat ii leat nu garra dávda ja manná badjel sullii 1-3 beaivvis siskkobealde jus muđui lea dearvvaš.

Buorre giehtabuhtisvuohta sáibbuin ja čáziin sáhttá eastadit njoammuma. Dat suddje maid ahte earáide ii njoamo virus. Giehtasprihta ii doaimma nu bures norosvirusa vuostá. Danne ii berre atnit giehtasprihta, muhto bassat baicce gieđaid sáibbuin ja čáziin.

Lea go dus leamaš golgodávda? De sáhtát dábálaččat vuolgit skuvlii dahje bargui fas go leat dearvvašnuvvan. Muhto mánát mánáidgárddis, olbmot geat barget biepmuin (ovdamearkka dihte stuoragievkkanis, kantiinnas, restauránttas, jna.) ja dearvvašvuođabargit eai galgga boahtit mánáidgárdái dahje bargui ovdalgo lea gollan 48 diimmu dan rájes go vuovssadit maŋŋemus ja/dahje luhčadávda nogai. 

Dál leavvá sihke dábálaš influeansa- ja nuorvovirus, ja dasa lassin leavvá covid-19 maid. Olbmot ávžžuhuvvojit bissut ruovttus jus álget dovdat ođđa vuoiŋŋahatdávdamearkkaid.

Buohkat, leaš dal buohcci dahje dearvvaš, berrejit maid doalahit buori giehta- ja gossanhygiena.

Olbmot geain lea stuorát riska duođalaččat buohccát sáhttet árvvoštallat atnit njálbmesuoji go lea váttis doalahit gaskka áigodagaid go lea olu njoammun servvodagas.

Geahča muđui dieđuid FHI neahttasiiddus.

Lea vejolaš boahkuhit sihke influeanssa ja covid-19 vuostá, ja earenoamážit leat muhtun olmmošjoavkkut ávžžuhuvvon boahku váldit. Gulat go ovtta daid joavkkuide mat leat ávžžuhuvvon boahku váldit? It go leat váldán boahku? De sáhtát váldit oktavuođa doavttirkantuvrrain dahje dearvvašvuođaguovddážiin oažžut eanet dieđuid.

Sávvat buori adveantaáiggi buohkaide!

Anne Lajla Kalstad, suohkanváldodoavttir