Guovdageainnu suohkan ii láve dábálaččat rihkkut almmolašvuođalága, muhto dát lei hui earenoamáš ášši mas eat ožžon ovttasge veahki movt galggaimet meannudit, ii Stáhtahálddašeaddji, KS iige departemeantta máhttán rávvet dahje neavvut min.

Dieđihuvvon olbmuide ii lean ovddiduvvon ášši sisdoalu birra dan dihte go eat lean álggahan barggu dieđihanáššiin. Lihkká meannudii Stáhtahálddašeaddji dieđihanášši oaidninváidalusa ja sáddii sladdejuvvon veršuvnna mediai. Suohkan ii lean ovtta oaivilis ja oaivvildii ii lean doarvái sladdejuvvon. 

Go de bođii váidda go suohkan ii addán oaidnima Kent Valio presentašuvdnii ovdagoddái, sáddejuvvui váidda, lága olis, Stáhtahálddašeaddjái váiddameannudeapmái. Sii eai sáhttán meannudit váidaga, go eat lean sádden presentašuvnna mielddusin. Doaibmi suohkandirektevra árvvoštalai ahte lei buoremus vuordit sáddemis presentašuvnna gitta lei čielggaduvvon movt ášši galggai meannuduvvot viidáset. 

Moaittehahtti dilálašvuođaid dieđihemiid ja rabasvuođa kombinašuvnnain ferte leat várrogas. Mii válljiimet maŋidit vástideames oaidnima dán earenoamáš áššis, gitta lei čielggaduvvon, dat lei dat mearrádus maid válddiimet, ii ge dan ahte dihtomielalaččat rihkkut lága. 

Vihtta mánu golle ovdal go ožžuimet čielggadeami, ja de sáddejuvvui presentašuvdna Stáhtahálddašeaddjái. 

Guovdageainnu suohkanis ii leat áigumuš rihkkut almmolašvuođalága dábálaš oaidningáibádusain. Guovdageainnu suohkanis háliidit rabasvuođa ja eat oaivvil ahte lea ortnegis dihtomielalaččat rihkkut lága. Muhto galggalii gávdnot láhka mii suddje dieđihanáššiid gitta bargoaddi geargá meannudemiin. Jus addá oaidnima dieđihanáššiide sáhttá balddihit nu ahte bargit eai duostta dieđihit moaittehahtti dilálašvuođaid birra. Eará elemeantta áššis lei dat dehálašvuohta ahte fuolahit riektesihkarvuođa daid eaŋkil olbmuide geat leat oassin dieđihanáššis. Mii fertiimet válljet riektesihkarvuođa ja rabasvuođa gaskkas, ja válljiimet suddjet dieđihuvvon olbmuid, gitta ášši lei čielggaduvvon. 

Unna servvodagas sáhttá vihkkedeapmi rabasvuođa ja eaŋkil olbmuid riektesihkarvuođa gaskkas leat hástaleaddji, leat máŋga vuhtiiváldimat maid ferte fuolahit.