3-jagá effektiviserenprošeavtta álggaheapmi

KS-raporttaid loahppabohtosat leat ahte Guovdageainnu suohkan ferte ovdánit, dahkat rievdadusaid ja ahte ferte doaimmahuvvot beaktileappot. Suohkan áigu dan dihte geahčadit movt buoridit ja organiseret suohkana sihkkarastin dihte buriid bálvalusaid min ássiide.

Suohkan diŋgui 2020 čavčča KOSTRA-raportta KS:s. Raporta čájeha ruhtageavaheami, ja suohkana hástalusaid ovddosguvlui. Dan oktavuođas diŋgojuvvui maid Suohkankompássaárvvoštallan KS:s. Árvvoštallan čájeha movt suohkan doaimmaha iežas bargguid ja addá bálvalusaid álbmogii. Raportta loahppaboađus lei maid ahte suohkan ferte ovdánit, dahkat rievdadusaid ja ahte ferte doaimmahuvvot beaktileappot.

Dan guovtti raportta dihte lea suohkanstivra mearridan ahte Guovdageainnu suohkan galgá čađahit 3-jahkásaš effektiviserenprošeavtta. Stáhtahálddašeaddji lea dáhkidan 2021 ovddas ja belohahkii lohpidan dáhkidit viidáset dan maŋŋel ja suohkanstivra lea juolludan ruđaid iežasoassái golmma jahkái.

Prošeakta lea leamašan fálaldatgilvvus man KS vuittii, ja mainna áigu álgit 2021 čavčča.

Suohkanláhka rievdaduvvui 01.01.2021 siskkáldas bearráigeahččama dáfus. Dalle šattai stuorát gáibádus dasa ahte suohkandirektevrras (ráđđeolbmás) galgá bearráigeahččat iežas organisašuvnna siskkáldasat ja viežžat raporttaid ovttadagain. Dan oktavuođas háliidii suohkan oppalaččat ođastit min siskkáldas bearráigeahččanvuogádaga ja dál lea álggahuvvon dálá vuogádagaid kárten ja riskasurggiid identifiseren.

Guovdageainnu suohkan áigu dás ovddosguvlui geahčadit movt suohkana buoridit ja organiseret sihkkarastin dihte buriid bálvalusaid min ássiide. Dan lea doaibmi suohkandirektevra geažidan, earret eará Stáhtahálddašeaddji riikkaviidosaš mánáidsuodjalusbearráigeahču oktavuođas.