Dábálaš ovdagihtii jienasteami áigodat lea borgemánu 10. beaivvi rájes válgajagis ja bistá maŋimuš bearjadahkii ovdal válgabeaivvi.

Váldde mielde legitimašuvnna go boađát ovdagihtii jienastit. Muđui it beasa jienastit, jus jienaid vuostáiváldi ii dovdda du. 
Suohkaniin lea ovddasvástádus vuostáiváldit ovdagihtii jienastemiid sisriikkas. 

Dearvvašvuođa- ja sosiálaásahusat ja ruovttus

Suohkan lea maiddái geatnegahtton váldit vuostá ovdagihtii jienastemiid suohkana dearvvašvuođa- ja sosiálaásahusain. 
Jienasteaddjit geat eai sáhte boahtit válgalatnjii buozalmasvuođa dahje lámisvuođa geažil, sáhttet váldit oktavuođa suohkaniin ja ohcat lobi jienastit ruovttus. 

Árrajienasteapmi

Jienasteaddjit geain ii leat vejolašvuohta jienastit dábálaš ovdagihtii jienasteami áigodagas dahje válgabeaivvi, sáhttet bivdit suohkana lágidit vejolašvuođa jienastit ovdagihtii. Árrajienastanáigodat álgá suoidnemánu 1. beaivvi válgajagis ja bistá dassážii go dábálaš ovdagihtii jienastanáigodat álgá, borgemánu 10. beaivve.