Sátnejođiheaddji

Hans Isak Olsen, sátnejođiheaddji 2019-.

Riegádan: 20.07.1957 

Sivilastatus: Náitalan

Bellodat: Guovdageainnu Dáloniid Listu

Duogáš:

Riegádan ja bajásšaddan  Guovdageainnus, váhnemat leaba eret Guovdageainnus ja Dálvvesvákkis, Davvi-Romsas. Áhčči bođii Guovdageidnui soađi oktavuođas, go son lei soalddát “Polititroppene“ nammasaš bataljovnnas ja bohte Ruoŧas gos sii ledje suodjalusoahpu ožžon. Bajásšaddan smávvádálolažžan gos birgejupmi lei moadde gusa, sávzza ja luondduávkkástallan. Lean náitalan, mus leat guokte bártni ja njeallje áddjuba. Mu oahppu leat guokte jagi  Samvirkehøgskolenis, Bærum, mii lea priváhta skuvla man Coop Norga eaiggáduššá. Čiekŋudanfága lea “administrasjon og ledelse“.  Mu bargoeallin lea 36 jagi Coop gávppis Guovdageainnus, stuora oassi dain jagiin jođiheaddjebargu. 10 jagi SAÁO jođiheaddjin Guovdageainnu vuođđoskuvllas. Buollinčáskadeaddji ja suovvabuokči Guovdageainnu dollačáskadanveagas áigodagas 1979-2017. Suodjalusbálvalusa čađahin IøIII Steinkjeras, GP:s Porsangmoenis, Alta bataljovnnas KpC:s, ja HV17:s gos ledjen offiseara fenrik grádain. Muđui lea mus stuora beroštupmi luondduávkkástallamii. Friddjaáiggis lean guhkes áiggi faláštallan iešguđetge surggiin báhčingilvvuin, maiddai našunála dásis. Lean bargan ollu jagiid mánáiguin  ja nuoraiguin báhčinsuorggis Guovdageainnu báhčinsearvvis.

 

Sátnejođiheaddji - suohkana bajimus luohttámušdoaibma

Sátnejođiheaddjis lea bajimus luohttámušdoaibma suohkanis ja lea maiddai suohkana lágalaš ovddasteaddji.

Sátnejođiheaddji deháleamos bargu lea jođihit suohkanstivračoahkkimiid ja ovdagotti. Son galgá bearráigeahččat ahte čoahkkimat čađahuvvojit mearriduvvon njuolggadusaid vuođul, ja ahte mearrádusat mat dahkkojuvvojit leat lobálaččat. Sátnejođiheaddjis ii leat váldi ieš okto mearridit suohkana ovddas. Spiehkastat dás leat smávit áššit main ii leat prinsihpalaš mearkkašupmi, jus suohkanstivra lea sirdán dan válddi sátnejođiheaddjái. Beaivválaš doaimmas, álbmotválljejuvvon áirasiid ovddas, lea sátnejođiheaddjis lagas gulahallan ráđđeolbmáin, gii lea suohkana hálddatlaš jođiheaddji. Sátnejođiheaddji maiddai ovddasta suohkana almmolaš galledemiid oktavuođas.

Čohkket suohkana álbmoga

Sátnejođiheaddji galgá leat dat mii čohkke suohkana álbmoga. Dát mearkkaša govdadit gulahallat ássiiguin, servviiguin ja ealáhusain Guovdageainnus, ja leat suohkana ovddasteaddji máilmmis. Sátnejođiheaddji galgá leat doarjjan ja oasseváldin proseassain ja áššiin mat ovddidit suohkana ja ássiid beroštumiid.

Sátnejođiheaddjis lea čoahkkin- ja sátnevuoigatvuohta buot álbmotválljejuvvon orgánain, muhto ii fal jienastanvuoigatvuohta jus fal ii leat válljejuvvon lávdegoddái dahje ráđđái.

Hans Isak Olsen
Sátnejođiheaddji/ordfører
E-poasta
Mobiltelefovdna 480 55 887