Ráhkadit sierra orrunovttadaga

Mearrádusas § 2-2 SAK10 čuožžu ahte lea dušše ohcangeatnegasvuohta go dálá viesus ráhkaduvvo orrunovttadat mas:

• leat buot orrunviesu váldofunkšuvnnat (beaivelatnja, oađđenlatnja, lávgunlatnja, gievkkan)
• lea sierra váldouksa ja
• lea fysalaččat sirrejuvvon eará ovttadagain

Gáibádusaid galgá dušše árvvoštallat dáid fysalaš iešvuođaid vuođul. Lea dehálaš aiddostahttit ahte láiguhit oasi viesus iešalddis ii mielddisbuvtte ohcangeatnegasvuođa. Nu guhká lanjat adnojit lobálaččat orrunovttadahkan, de sáhttá láiguhit dan orrunovttadahkan.

Goas lea orrunovttadat fysalaččat sirrejuvvon?

Gáibádus fysalaš sirremii mearkkaša ahte ii leat vejolaš beassat nuppi viessooasis nubbái, nu ahte ii šatta mannat olggos dahje oktasašareálaid čađa. Váldogeardi ja geallir leat orrunovttadagat jus lea siskkáldas tráhppá gaskal daid. Dát gusto vaikko tráhppá lea steŋgejuvvon lássejuvvon uvssain, ja váldogearddis ja gealláris goappešagain leat buot váldofunkšuvnnat.

Geahča SAK10 §2-2 bagadusa eanet dieđuid dáfus.