Jus leat vásihan seksuálalaš veagalváldima de lea dehálaš ahte válddát oktavuođa Guovdageainnu doavttervávttain tlf. 116 117
Don sáhtát riŋget ovddalgihtii dahje boahtit dearvvašvuođaguovddáža olggobeallai. Sáhtát váldit mielde soapmása geasa luohtát, dahje boahtit okto.

Jus veagalváldin lea aitto dáhpáhuvvan, lea dehálaš ahte it riššut, bora, juga dahje mana hivssegis ovdalgo boađát.  

Doavttir ja buohccidivššár vuostáiváldiba du oadjebas birrasis doavttirvávttas. Soai váldiba oktavuođa veahkaválddálašvuođa vuostáiváldimiin Álttás, gos lea buohccidivššár ja doavttir geain lea erenoamáš gelbbolašvuohta  veahkaváldimis. 

Dalle fállojuvvo dutnje vuolgit veahkaválddálašvuođa vuostáiváldimii, ja dábálaččat lea dat Álttás. Muhtomin fertejit muhtimat mannat Hámmerfestii, dát guoská earret eará mánáide geat leat vuollel 14 jagi. 

Veagalválddi gillájeddjiid vuostáiváldinbáikkiin Álttás / Hámmerfeasttas  

Veagalválddi gillájeddjiid vuostáiváldinbáiki fállá akuhtta medisiinnalaš divššu ja ráđđeaddima dutnje gii leat vásihan seksuálalaš veagalváldima (eanemus vahkku maŋŋel veagalváldima).  Veagalválddi gillájeddjiid vuostáiváldinbáiki lea nissonolbmuid ja dievdoolbmuid várás geat leat boarráseappot go 14 jagi. Fálaldat lea nuvttá ja lea rabas birra jándora.  Fálaldat lea sorjjasmeahttun politiijadieđáhusas ja buohkain geat barget dáppe lea jávohisvuođageasku.

Fálaldat veagalválddi gillájeddjiid vuostáiváldinbáikkis 

• Fuolahus oadjebas birrasis
  Don deaivvat hárjánan buohccedivššára ja doaktára geaiguin sáhtát hupmat oadjebas birrasis. 
• Medisiinnalaš iskkadeapmi ja diehtojuohkin
  Jus háliidat, de sáhtát oažžut medisiinnalaš divššu ja čuovvoleami vahágiid, njoammudávddaid, áhpehisvuođa ja eará beliid oktavuođas. 
• Riektemedisiinnalaš iskkadeapmi duođaštusaid sihkkarastit
  Vejolaš diggeáššis lea dehálaš čađahit riektemedisiinnalaš iskkadeami duođaštusaid sihkkarastima várás.
• Ráđđeaddi- ja čuovvolanságastallamat
  Mii fállat akuhtta heahterávvagiid ja čuovvolanságastallamiid. Vásáhusat čájehit ahte lea ávkkálaš váldit vuostá ámmátlaš rávvagiid go vásiha heahtediliid. Jus dárbbašat eanet veahki, de sáhttit čujuhit eará ásahusaide.
• Veahkkeadvokáhtta
  Jus don leat vásihan veagalváldima, de lea dus vuoigatvuohta oažžut nuvttá advokáhtaveahki. Veagalváldinossodat veahkeha oažžut oktavuođa nu ahte advokáhtta sáhttá rávvet du viidáseappot. 
• Vejolaš váidin
  Jus háliidat váidit ášši, de sáhttit mii váldit oktavuođa politiijain, muhto politiijaváidda ii leat eaktu jus áiggut geavahit fálaldaga.
   

Don ieš mearridat makkár osiid fálaldagas háliidat váldit vuostá, ja mii maid árvvusatnit du válljejumiid!

Muitte ahte don it leat okto!