Mii lea dearvvašeallinguovddáš?

Dearvvašeallinguovddáš lea Guovdageainnu suohkana stuorámus dearvvašvuođa áŋgiruššan. Guovddáš lea rabas buohkaide, ja fállá bálvalusaid olles álbmogii. Guovdageainnu dearvvašeallinguovddáš lea nuvttá dearvvašvuođafálaldat suohkanolbmuide, ja fállá dearvvašvuođaovddideaddji ja eastadeaddji dearvvašvuođabálvalusaid. Dearvvašeallinguovddáš galgá leat oadjebas báiki gos olbmot sáhttet deaivvadit sosiála doaimmaide, rumašlaš lihkadeapmái, fysalaš doaimmaide ja hárjehallamii. Doppe galgat maiddái juogadit ávkkálaš ja dehálaš máhtu.

Mii háliidit juogadit dakkár máhtolašvuođa mat sáhttet veahkehit olbmuid iežaset dearvvašvuođa áimmahuššat buoremus lági mielde,, danne áigut dađistaga maiddái fállat logaldallamiid ja kurssaid.

Mihttu lea ovdánahttit giliolbmuid dearvvašvuođa, veahkehit rievdadit eallindábiid ja eastadit buozalmasvuođaid. Dearvvašeallinguovddáš galgá leat buorre ovttasbargoguoibmi ja resursa suohkana álbmotdearvvašvuođabargguin. Mii háliidit nanu ja bistevaš dearvvašvuođabálvalusa álbmogii.

Gos gávnnat dearvvašeallinguovddáža

Mii boahtit atnit earret eará Báktehárjji, dearvvašvuođaguovddáža ja fysioterapiijabálvalusa lanjaid joavkohárjehallamiidda ja oahpahussii/kurssaide.

Vilde Márjá Eriksen Hensema lea dearvvašeallinkoordináhtor ja oahppan fysioterapevta. Fágalašovddasvástideaddji lea suohkanváldodoavttir Ánne Lájlá Westerfjell Kalstad.

Rabasáiggit

Guovddáža rahpanáiggit leat mánnodagas duorastahkii dii. 09–15.

 Dasa lassin lea rabas juohke disdaga ja gaskavahku dii. 09-19.

Hárjehallanfálaldagat

Njuoratmánnájoavku
Juohke gaskavahkku dii. 12 lea hárjehallan fysioterapiijabálvalusa lanjain. Dasa lassin šaddá maiddái njuoratmánáid deaivvadeami Guovdageainnu álbmotgirjerádjosis, go leat temát ja “loga mánnái”, ja njuoratmánálávlun lea searvegoddeviesus, geahča sierra plána dan birra. Njuoratmánnádeaivvadeapmi lea fálaldat váhnemiidda geat leat ruovttus virgelobis. Váhnemat sáhttet maiddái oažžut individuálalaš čuovvoleami fysioterapevttas jus lea dárbu. Váldde oktavuođa Vilde Márjjáin telefuvnna bokte, dahje May-Lise Triumf dearvvašvuođastašuvnnas. 

Lášmadis olmmoš (Gievrudanhárjehallan)
Gievrudanhárjehallan iešguđetlágan gievrudandoaimmaiguin. Hárjehallan iežas gorutdeattuin, gummebáttiiguin, manuálaiguin jna. Ii leat dárbu dieđihit, boađe hárjehallat! Heive buohkaide. Hárjehallan sáhttá sirdojuvvot olggos giđđat/geasset. Vilde Márjá lea joavkoinstruktevra. Hárjehallan lea juohke disdaga dii. 18 ja juohke duorastaga dii. 09 Báktehárjjis.

Sávri (Sávrodanhárjehallan)
Sávrudeapmi intervállaiguin, don sáhtát viehkat dahje vázzit! Hárjehallan heive buohkaide! Mii liekkadit fárrolaga álggos. Vilde Márjá lea joavkoinstruktevra. Hárjehallan lea olgun juohke gaskavahku dii. 18. Deaivvadit skuvlabálgás dii. 18. 

Lášmadis pensionista (Gievrudan- ja dássádushárjehallan)
Gievrudanhárjehallan ja dássádushárjehallan (balansetrening). Hárjehallan iežas gorutdeattuin, gummebáttiiguin, manuálaiguin jna. Joavku heive dutnje gii leat ealáhagas, ja leat dan muttus searra ahte it dárbbat vázzinveahkkeneavvuid dahje doarjaga hárjehaladettiin. Hárjehallan ii leat dušše pensionistaide, muhto heive buohkaide! Vilde Márjá lea joavkoinstruktevra. Hárjehallan lea juohke duorastaga dii. 10 Báktehárjjis. 

Ložžedallan-joavku
Ložžedallan-joavku lea joavku gos mii ložžedallat čavgan dehkiid, lotkudit iežamet ja vuoigŋat. Ložžedallan-joavku lea juohke disdaga dii. 19 ja juohke duorastaga dii. 11 Báktehárjji Kaféas. Váldde áinnas mielde ránu ja/dahje liegga biktasiid jus leat hárjehallan ovdal ložžedallama. Lina Márjá lea joavkoinstruktevra.

Eará fálaldagat plánema vuolde

•    Dearvvašeallinlávvu
•    Lávvuságastallamat & káffe
•    Juoiganjoavku
•    Sávrres váibmu (váibmo- ja geahppájoavku)
•    Murjet ja oaggut čakčat
•    Kursa - Buorre biebmu (Rávisolbmuide ja bearrašiidda)
•    Psyhkalaš dearvvašvuohta ja árgabeaimokta
•    Seksuála dearvvašvuohta
•    Oađđin ja oađđinváttut: Kursa - Oađe njálgát
•    Ahkemolsun
•    Riskavuloš alkoholageavaheapmi ja heaitit borgguheamis ja snuvssaiguin 

Jus leat gažaldagat, de váldde oktavuođa dearvvašeallinkoordináhtoriin Vilde Márjá telefovnnas +47 458 30 255 dahje e-poasttas.

Váldde áinnas oktavuođa jus jurddašat dahje sávat eará áigeguovdilis dearvvašvuođabálvalusaid ja fálaldagaid guovddážii.  

Bures boahtin buohkaide, sávvat mii oaidnalit!

Njuoratmánnájoavku ja hárjehallan