Kulturskuvlla vuođđu lea humanisttalaš olmmošoaidnu ja servodatárvvut nu go searve¬vuohta, sátnefriddjavuohta, olmmošárvu ja demokratiija. Okta kulturskuvlla servodatdoaimmain lea speadjalastit kultuvrralaš ovdanbuktimiid máŋggabealátvuođa, ja veahkkin loktet dáidaga ja kultuvrra guoddevaš elemeantan servodatovdáneamis.

Kulturskuvla lea suohkanlaš astoáiggefálaldat, mii lea organiserejuvvon juogo sierra skuvlan dahje dábálaš skuvladoaimma ja muđui kultureallima oktavuođas, ja man stáhta, suohkan ja skuvlaruđat ruhtadit. Kulturskuvla galgá eanas oahpahit musihka, teáhtera, dánssa, visuála dáidaga ja hutkkálaš čállima, muhto sáhttá maid oahpahit eará fáttáid kultur- ja dáiddafágas.

Kulturskuvlla oahpahus lea heivehuvvon iešguđetlágan ahkejoavkkuide. Ulbmil lea veahkkin hukset mánáid ja nuoraid estehtalaš, sosiála ja kultuvrralaš gelbbolašvuođa ja návccaid jurddašit kritihkalaččat ja dahkat mearrádusaid iešheanalaččat. Kulturskuvla galgá áimmahuššat sihke viidát, muhto maiddái taleanttaid, ja fálaldagat galget leat máŋggaláganat. Dáppe besset mánát ja nuorat geahččaladdat ja čiekŋudit dasa masa sis lea beroštupmi. Lea maid báiki gos beassá deaivvadit olbmáiguin ja oassálastit searvevuhtii.

Kulturskuvllat leat 1997 rájes nannejuvvon Oahpahuslágas,§ 13-6. Musihkka- ja kulturskuvlafálaldat:«Buot suohkaniin galgá juogo alddis dahje ovttas eará suohkaniiguin leat musihkka- ja kulturskuvlafálaldat mánáide ja nuoraide, organiserejuvvon lahkalaga skuvllain ja kultureallimin muđui.»

Guovdageaidnu lea guovttegielat suohkan, gos sámi giella ja kultuvra leat eanetlogus. Guovdageainnu ja Máze kulturskuvlii lea lunddolaš váldobargu gáhttet, doaimmahit ja ovdánahttit sámi kulturárbbi.
"Earáid kultuvrraid doahttaleapmi eaktuda ahte dovdá iežas kultuvrra ja ahte lea oadjebas iežas identitehtain." (Kulturskuvlla rámmaplána s. 7)
 

Min suohkanis orrot maid olbmot geain lea eará našunalitehta ja čearddalašvuohta, maid mii háliidit fátmmastit, vai oažžut rikkis, máŋggabealát kultureallima ja searvaidahtti servodaga visot min mánáide ja nuoraide. Min prográmmat ja kurssat leat láhččojuvvon buot ohppiide buotlágan duogážiin. Min oahpaheddjiid váldogiella lea sámegiella ja dárogiella, muhto jus fal gávdno fágačehppodat, de mii maid atnit eará gielaid veahkkegiellan.

Kulturskuvla lea Kulturviesus ja dan jođiha kulturskuvlajođiheaddji oasseáiggebarggus. Mii bargat ovttas skuvllaiguin ja eará aktevrraiguin suohkanis. Min bargolanjat leat eanas kultur-viesus, LES-viesus ja Máze skuvllas, muhto maid eará heivvolaš sajiin suohkanis.