Don sáhtát iskat leat go don dan suohkana jienastuslogus gos dál orut, go dat biddjojuvvo almmolaš geahčadeapmái dain báikkiin mat leat dieđihuvvon dás vuollelis.
Jus leat fárren eará suohkanii ja fárrendieđáhus ii leat ollen álbmotregistarii ovdal geassemánu 30. beaivvi, de leat don ain dan suohkana jienastuslogus gos fárrejit eret. De fertet juogo ovddalgihtii jienastit dahje boahtit válgabeaivve dan suohkanii go ásset geassemánu 30. beaivvi.
Jus oaččut válgakoartta de mearkkaša dat ahte don leat jienastuslogus. Válgakoarttas čuožžu guđe suohkana jienastuslogus don leat, guđe biirii don gulat ja dán biire jienastanáiggit. Jus it leat ožžon válgakoartta borgemánu 10. beaivvi rádjái, de berret váldit oktavuođa suohkaniin ja iskat leat go don čálihuvvon jienastuslohkui.
Muitte viežžat válgakoartta telefovdnii, ja váldde áinnas koartta mielde go vuolggát jienastit.
Jus du namma ii leat jienastuslogus, dahje jus gávnnat eará boasttuvuođaid listtuin, de sáhtát váidit. Váidda galgá leat čálalaččat ja váidda galgá čilgejuvvot. Váidaga sáddet suohkana válgastivrii. Rievttes čujuhusa gávnnat dás vuollelis.
Sámedikki jienastuslohku lea maid biddjojuvvon almmolaš geahčadeapmái seamma sajis ja seamma áigge. Sámedikki jienastuslogu váidimat galget sáddejuvvot Sámediggái.
Jienastuslohku lea almmolaš geahčadeapmái čuovvovaš báikkiin:
- Guovdageainnu bálvaluskántuvra
- Guovdageainnu álbmotgirjerájus
- Máze skuvla
Jienastuslogu váidimiid sáddet deike:
Guovdageainnu suohkan
Bredbuktnesveien 6
9522 Guovdageaidnu