Ástoáiggekoarta

Astoáiggekoarta Guovdageainnu suohkanis

Buot mánát ja nuorat gaskal 6 ja 18 jagi geain lea álbmotregistrerejuvvon čujuhus Guovdageainnus, ožžot kr 1000 jahkebealis ovtta dahje eanet fásta organiserejuvvon astoáiggedoaimmaide mat leat deike registrerejuvvon: Kautokeino.Friskus.com. Astoáiggekoartta ulbmil lea ahte eanet mánát ja nuorat oassálastet fásta, organiserejuvvon doaimmaide.

Guovdageaidnu lea okta 24 pilohtasuohkanis mat leat mielde geahččaleame astoáiggekoartaortnega 2021/2022, ovttas Mánáid-, nuoraid- ja bearašdirektoráhtain (Bufdir).

Dá leat máŋga filmmaža mat čájehit movt vieččat astoáiggekoartta ja movt mávssát dainna:

https://www.friskusas.no/hvordan-gjor-du-det/

Mii lea astoáiggekoarta? 

Dat lea fálaldat visot mánáide ja nuoraide gaskal 6 ja 18 jagi geain lea álbmotregistrerejuvvon čujuhus Guovdageainnus. Oaččut gitta kr 1000 jahkebealis mainna mávssát ovtta dahje eanet astoáiggedoaimmaid. Astoáiggekoarta lea persovnnalaš, ii ge dan sáhte sirdit oappáide, vieljaide ja earáide. Astoáiggekoartta ulbmil lea ahte eambbosat servet ja fátmmastuvvojit.

 

Geat sáhttet oažžut Astoáiggekoartta?

Mánát ja nuorat gaskal 6 ja 18 jagi geain lea álbmotregistrerejuvvon čujuhus Guovdageainnu suohkanis. Oappážagat ja vieljažagat ožžot ovtta koartta guhtege. Ruđat mat leat Astoáiggekoarttas gullet ovttaskas mánáide, ii ge daid sáhte sirdit oappáide ja vieljaide dahje eará mánáide jus ii šatta atnit daid. Astoáiggekoarta gusto dan kaleandarjagi rájes go deavddát 6 jagi, ja olggos dan kaleandarjagi go deavddát 18 jagi.

 

Gos gávdná listtu doaimmain maidda sáhttá atnit Astoáiggekoartta Guovdageainnus?

Guovdageainnu Astoáiggekoartta sáhttá atnit doaimmaide mat leat registrerejuvvon neahttasiidui kautokeino.friskus.com. 


 

Goas sáhttá Astoáiggekoartta váldit atnui?

Skábmamánu 2021 rájes sáhtát viežžat Astoáiggekoartta ja máksit dainna dáppe: kautokeino.friskus.com

 

Movt sáhttet mánát ja nuorat atnit Astoáiggekoartta du organisašuvnnas?

Searvvit ja organisašuvnnat fertejit dieđihit iežaset lágideaddjin ja laktit iežaset Astoáiggekortii neahttasiiddus kautokeino.friskus.com vai mánát ja nuorat sáhttet máksit divatmávssu Astoáiggekoarttain.

Neahttasiiddus kautokeino.friskus.com galgá sihke viežžat Astoáiggekoartta ja máksit divatmávssu.

Movt viežžat Astoáiggekoartta?

  1. Mana kautokeino.friskus.com-siidui. Fertet atnit Chrome-neahttalohkki.
  2. Ráhkat persovnnalaš geavaheaddjekonto badjin olgeš bealde – “ČÁLIT SISA”
  3. Mana iežat profiilii ja coahkkal “ASTOÁIGGEKOARTA”-boalu
  4. Coahkkal “VIEČČA ASTOÁIGGEKOARTTA” ja čuovo cehkiid.
  5. Vállje dan searvvi/organisašuvnna masa du mánná háliida atnit Astoáiggekoartta ja čuovo cehkiid.
  6. Divatmávssu/hárjehallandivada galgá máksit searvái/organisašuvdnii njuolga neahttaportálas. 

Jus leat deavdán 13 jagi ja dus lea iežat Bank-ID, de sáhtát ieš dan dahkat. Jus ii, de ferte váhnen/ovddasteaddji veahkehit du.

Mun in gávnna dan searvvi/joavkku/organisašuvnna mas lean miellahttu

Dat mearkkaša ahte searvi/organisašuvdna ii leat vuos dieđihan iežas lágideaddjin neahttasiiddus kautokeino.friskus.com.
Don sáhtát váldit oktavuođa njuolga servviin/organisašuvnnain ja sihtat sin ásahit lágideaddjesiiddu, dahje sáhtát váldit oktavuođa nuoraidkoordináhtoriin Elle Garenin

(e-boasta: ekmk@kautokeino.kommune.no) vai son váldá oktavuođa singuin.

Movt jus divatmáksu lea unnit dahje eanet go 1000 kr?

Jus mávssát unnit go 1000 ruvnno

fásta astoáiggedoaimma ovddas, de orrot dat ruđat mat báhce Astoáiggekoarttas olggos dan áigodaga. Loahppasupmiin sáhtát máksit eará fásta astoáiggedoaimma. Loahppasupmi ii sáhte sirdit ovtta áigodagas nubbái.

Jus divatmáksu lea eanet go 1000 ruvnno

de fertet ieš máksit loahpa. Jus divatmáksu lea omd. 1500 ruvnno, de mávssát 1000 kr iežat Astoáiggekoarttain, ja de máksá váhnen/ovddasteaddji dan 500 ruvnno mii báhcá iežas neahttabáŋkkus.

Movt jus in ane visot ruđaid Astoáiggekoarttas?

Don it sáhte oažžut máksojuvvot ruđaid mat leat Astoáiggekoarttas, daid sáhttá atnit dušše doaimmaide mat leat ortnegis mielde.

Astoáiggekoartta ruđat gullet juohke ovttaskas mánnái, ii ge daid sáhte sirdit oappáide ja vieljaide.

Don it sáhte sirdit loahpparuđaid ovtta jahkebealis nubbái.

 

Eavttut doaimmaide maid Astoáiggekoarta gokčá

  • Doaibma ferte čađahuvvot unnimusat 4 geardde jahkebealis
  • Doaibma ferte leat mánáide ja nuoraide gaskal 6 ja 18 jagi
  • Doaimma haddi ii sáhte lassánit astoáiggekoartta álggaheami dihte
  • Lágideaddji ferte leat registrerejuvvon Brønnøysundregistariidda ja ferte sihkkarastit ahte buohkat geat barget mánáiguin ja nuoraiguin buktet dohkálaš politiijaduođaštusa
  • Doaibma ferte leat registrerejuvvon Guovdageainnu suohkana digitála čovdosii kautokeino.friskus.com
  • Organisašuvnnat fertejit dohkkehit suohkana eavttuid personsuodjalussii ja oadjebasvuhtii digitála čovdosis

Naba leaira, dávvirat, gilvaleamit ja nu ain?

Astoáiggekoartta ruđaiguin sáhtte máksit dušše divatmávssu/hárjehallandivada. Daiguin ii sáhte oastit dávviriid iige máksit leairraid/cupaid ovddas.

Mii ávžžuhit visot servviid/organisašuvnnaid bidjat sierra ortnegiid johtui gos sáhttet luoikkahit, oažžut ja lonohallat dávviriid dalle go lea vejolaš. Dat lea buorre birrasii ja searvadahtti mánáide/nuoraide!

Sáhtášeiddet maid leat dihtomielalaččat ja vuodjit ovttas sihke vahkkosaš čoahkkimiidda ja leairraide/cupaide.

Guovdageainnu girjerádjosis sáhttá maid nuvttá luoikkahit faláštallan- ja astoáiggedávviriid mánáide ja nuoraide. Sis sáhttá luoikkahit earret eará sabehiid, čuoiganskuovaid, soppiid, luisttiid, sihkkeliid, lávuid, tealttáid, firpmiid, astoáiggedávviriid, keyboarda ja gitára. Dávviriin lea vahkku luoikkahanáigi. Dávvirkataloga gávdno dáppe: https://www.guovdageainnu.suohkan.no/tjenester/kultur-sprak-og-ungdomstilbud-spillemidler/utstyrssentral/. Katalogas oaidná maid mii leat go sis siste dat dávvirat.


Dárbbašat go eanet dieđuid dahje veahki?

Váldde oktavuođa Guovdageainnu suohkana astoáiggekoartta prošeaktajođiheddjiin jus leat jearaldagat dahje dárbbašat veahki:

Ellen Karin Marjana Gaup
Nuoraidkoordináhtor
E-poasta
Mobiltelefovdna 401 05 319