Min fálaldagat

Buohkat gaskkal 6–18-jagi leat buresboahtin min kulturskuvlii. Min fálaldagat fállojuvvojit dainna eavttuin ahte mis leat doarvái oahpaheaddjenávccat, ekonomiija ja oahppit. Musikála ja joavkočuojaheami lassin mat bistet guhkit áigge, mii fállat oanehit kurssaid mat bistet 6 vahkku. Dát kurssat leat oaivvilduvvon álggaheapmin kulturskuvlla iešguđetlágan fágaide. Buot oahpahus lágiduvvo Guovdageainnu čoahkkebáikkis, earret go musihkka­joavko­čuoja­heapmi mii lea Mázes.

Juohke fágas oahpahuvvo guokte diimmu vahkkui, muhto čájáhusaid dahje čájálmasaid oktavuođas sáhttet leat dávjjibut, ovdamearkka dihte ovtta vahkkoloahpas. Min fálaldagat leat juhkkojuvvon iešguđetlágan ahkejoavkkuide: 6–12-jahkásaččaide (1–7. luohkáide), 13–18-jahkásaččaide (8–10. luohkáide, ja joatkkaskuvla-ahkahaččaide). Fertejit leat unnimusat vihtta oahppi ovdal go kursa álggahuvvo. Muhtin fágain sáhttet ahkejoavkkut oktiičasko­juvvot jus leat beare unnán oahppit goabbat ge joavkkus.

Geahča min jahkeplánas (PDF, 122 kB) goas dat iešguđetlágan kurssat lágiduvvojit. Lea láhččojuvvon dainna lágiin ahte oahppit galget sáhttit oassálastit máŋgga fálaldahkii oktanis.

Dás dieđihat iežat mielde.

Viidodatprográmmá ja 6 vahkosaš kurssat:
 

Teáhter ja muitaleapmi, 6–12-jahkásaččaide ja 13–18-jahkásaččaide

Dát lea praktihkalaš álggahankursa teáhtera vuođđoelemeanttaid, rollaid, gaskkusteami, ovttasbarggu ja hutkkalaš jurddašeami birra. Oahppit ohppet drámástoahkamiid, improvisa­šuvnnaid, teáhtervaláštallamiid, ovttasdoaimma ja sosiála searvevuođa bokte. Dás ii leat mihkkege maid gohčodit «boastut», ja oahppit ohppet doahttalit iežaset ja earáid olmmožin ja dáiddárin.

Ohppiide gaskkal 13–18-jagi ávžžuhuvvo dát kursa ovdakursan min musikálaguovddáš­prográmmii.

Dánsun, 6–12-jahkásaččaide ja 13–18-jahkásaččaide

Dán kurssa sisdoallu rievddada oahpaheddjiid mielde ja das makkár šáŋŋera oahpaha. Sáhttet leat urbána dánsunmállet nu go street, break ja hiphop, muhto maid lullisámi dánsa «sydis» ja eará sámi dálááiggi dánssat.

Min dánsunkurssain lea proseassa seamma guovddážis go bohtosat, ja dehálaš oasit fágas leat doaimmahit, gaskkustit, hábmet, vásihit ja reflekteret.

Filbma, 13–18-jahkásaččaide

Álggahankursa filmma ja filbmabuvttadeami vuođđomáhtu birra. Kursa lea ovttasbargu ISFI'ain (International Sámi film Institute). Eanet dieđut almmuhuvvojit maŋŋel.

Musihkka, juoigan ja lávlun, 6–12-jahkásaččaide ja 13–18-jahkásaččaide

Kursa dasa gii liiko atnit jiena, áinnas ovttas musihkain. Dáppe oahppá veaháš iešguđetlágan šáŋŋeriid birra, juoigama, lávluma ja ráppa birra. Oahppi sáhttá válljet kurssa čađahettiin makkár šáŋŋerii háliida čiekŋudit. Oahpahus lea sihke joavkkuid mielde ja individuálalaččat.

Visuála dáidda ja duodji, 6–12-jahkásaččaide ja 13–18-jahkásaččaide

Visuála dáidda sáhttá leat olu, ovdamearkka dihte govvadáidda, bázzi, tekstiila, bivttas­design, dáiddaduodji ja sámi duodji. Dat vuolgá das makkár oahpaheaddjit mis leat ja makkár lanjaid beassat atnit, muhto sámi duodji boahtá álo leat guovddáš doaibma.

Hutkkálaš čállin, 13–18-jahkásaččaide

Oahpa čállit teavstta dahje oaččo veahki buoridit iežat teavsttaid. Oahppit oahpásmuvvet iešguđetlágan šáŋŋeriiguin, ovdamearkka dihte poesiijain, prosain, dramáhtalaš teavsttaiguin, slampoesiijain, ráppateavsttaiguin, lávllateavsttaiguin ja luohtedajahusaiguin.

Juovlakaleandar, 6–12-jahkásaččaide ja 13–18-jahkásaččaide

Juovlakaleandar álggahuvvo golggotmánu ja das lea čájálmas ovdal juovllaid. Lea jurdda­šuvvon mánáide ja nuoraide vuođđoskuvla- ja joatkkaskuvlaagis. Oahppit juhkkojuvvojit joavkkuide ja besset bargat daid iešguđetlágan šáŋŋeriiguin. Bargu biddjojuvvo čoahkkái oktan čájálmassan mii čájehuvvo juovlaloahpaheamis. Dát lea kulturskuvlla ja Giellagiissá ovttasbargoprošeakta. Dárkilet dieđut dán kurssa birra bohtet maŋŋel.

 

Guovddašprográmma: 
 

Joavkočuojaheapmi Mázes, 13–18-jahkásaččaide

Oahppit ohppet vuđolaš gálggaid dáid instrumeanttaiguin: rumbbuiguin, bássain, gitárain ja piánoin čuojahit, ja lávlut, ja guovddážis lea sámi musihkka ja luohti. Sii ohppet čuojahit ovttas, ja teknihkalaš áššiid nu go PA-rusttega atnit.

Musikála, 13–18-jahkásaččaide

Musikála lea drámáhápmi mii ovttasta musihka, lávluma, dánsuma ja hupmama/­ságas­talla­ma. Kursa álggahuvvo juohke čavčča, ja mii bargat systemáhtalaččat čájálmasa guvlui mii galgá čájehuvvot beassážiid nuppi jagi. Dáppe besset oahppit oahppat musihka, dánsuma ja teáhtera birra eanet ulbmillaččat, ja besset maid oahpásmuvvat musikála eará dáidda­surggiide: jietna, čuovga, scenografiija, manus- ja lávllačállin, kostymat, hámat/vuoidan.

Eavttut beassat leat mielde musikálii lea ahte oahppis lea veaháš máhttu ovdagihtii, ahte ollašuhttá unnimusat ovtta dáin gáibádusain:

·         lea ovdal čuvvon ovtta dahje eanet ovttaskasfágaid kulturskuvllas

·         lea oassálastán Fárus-prošektii 2021–2022

·         lea čađahan teáhterálggahankurssa dahje ovtta min eará 6-vahkkosaš kurssa

·         lea musihkkaoahppi Mázes

·         lea leamašan mielde eará relevánta doaimmas

Gitára. Piano. Juoigan. 6–12-jahkásaččaide ja 13–18-jahkásaččaide

Mii sáhttit lágidit kurssa dáid fágain jus leat doarvái ohccit ja mis leat oahpaheaddjit. Dat sáhttet lágiduvvot 6-vahkkosaš kursan dahje jahkebealkursan, ja sáhttá lágiduvvot oktanis daid eará fágaiguin mat leat biddjojuvvon doaibmaplánii.

Guovdageainnu kulturskuvla Kautokeino kulturskole
E-poasta
Telefovdna 922 87 543
Marie Kvernmo
Kulturskoleleder
E-poasta
Telefovdna 922 87 543