Tableahtat, namain Paxlovid, geahpidit riskka bahát buohccát. Lea mávssolaš árrat dálkkodišgoahtit tableahtaiguin.
Jus dus lea stuora riska bahát buohccát ja oaččut vuoiŋŋahatdávdamearkkaid, de berret váldit koronateastta.

Geaidda ávkkuhit tableahtat? 

Leat earenoamážit golbma joavkku geaidda ávkkuha dálkkodeapmi Paxlovid-tableahtaiguin:

• Sis geain lea duođalaš immuvdnaváili.
• Sii geat leat badjel 65 jagi, geat eai leat ožžon boahkuheami maŋemus guđa mánus ja geain lea duođalaš dávda.
• Buohkat geat leat badjel 80 jagi.

Maid galggat dahkat jus oaččut vuoiŋŋahatdávdamearkkaid?

Vuoiŋŋahatdávdamearkkat leat dakkárat ahte njunni buđđosa, lea gosahat, ja njiellu lea sárjjis. Dávjá lea maid dus feber dahje oaivebávččas.

Jus alddát lea stuora várra bahát buohccát koronain ja oaččut vuoiŋŋahatdávdamearkkaid, de berret iešteastta váldit – gitta njeallje beaivve. 

Jus ieštesten čájeha dus lea korona, de berret váldit oktavuođa fástadoaktáriin dahje doavttervávttain. 

Jus teasta čájeha dus ii leat korona, de it dárbbat váldit oktavuođa fástadoaktáriin. 

Jus dávdamearkkat vearáskit, de berret váldit oktavuođa doaktáriin, vaikko ieštesten ii čájet dus lea korona.

Geas lea stuora riska bahát buohccát?

Dus lea stuora riska bahát buohccát koronain jus:

• Dus lea duođalaš immuvdnaváili. Ovdamearkka dihte danne go dus lea ađadákteborasdávda dahje lymfaborasdávda ja oaččut dálkasiid mat váikkuhit dávddaid vuostálastinnákcii. 
• Leat badjel 65 jagi boaris, dus lea duođalaš kronalaš dávda, ja it leat ožžon boahkuid maŋemus guđa mánus.
• Leat badjel 80 jagi boaris.
• Leat badjel 50 jagi boaris itge leat goassege váldán koronaboahku.

Helsenorges gávnnat eanet dieđuid das geain lea stuora riska ja maid galggat dahkat jus buohccát 

​​​​​​​Dálkkodeapmi dálkasiiguin ii buhtte boahkuid. Buoremus maid sáhtát dahkat lea váldit koronaboahku vai it buohccá baháid.