Veahkki boazodollui guohtunroasu oktavuođas

Siidaoasi jođiheaddjit sáhttet dál ohcat gitta ru 50 000,- doarjaga guohtunroasu oktavuođas

Suohkanstivrra mearrádus

Suohkanstivra lea 07.04.2022 juolludan ru 200 000,- heahtefondii mii lea sidjiide geain lea siidaoassi ja geat dál vásihit guohtunroasu. Dát ruhttá boahtá lassin dasa mii lea báhcán heahtefondii mii ásahuvvui 2020is. Oktiibuot lea de ru 553 504,- mii lea ohcanláhkái sidjiide geain leat boaldámušgolut lassánan seamma áigodagas diimmá ektui. Doarjja sáhttá leahkit gitta ru 50 000,- rádjái.

Njuolggadusat leat dat seamma go 2020is, muhto dás leat rievdadeamit, ja dál ii leat šat vejolaš ohcat koronaguoskevaš áššiide juste dien foanddas. Rievdaduvvon njuolggadusaid (PDF, 181 kB) sáhtát lohkat dán siiddus. Ohcan sáddejuvvo regionalforvaltning.no bokte, ja ohcanskovvi lea jo rahppon dál.

Siidaoasi jođiheaddjit sáhttet ohcat  jus duođaštit ahte guohtunroasu váikkuhusat leat dagahan ahte boaldámušgolut áigodagas 01.01.2022 gitta 30.04.2022 leat lassánan go buohtastahttá seamma áigodaga 2019.

Áššemeannudeapmi dáhkko dađistaga. Dat ohcamat mat leat devdojuvvon ollislaččat vuoruhuvvojit ovddemussii. Juolludeapmi dahkko nu guhka go heahtefoanddas lea ruhttá. Gaskavahkku 15.06.2022, dii. 23:59 giddejuvvo vejolašvuohta sáddet ohcama.

Ovdamearka movt ohcat 

Dáppe oainnat ovdamearkka movt boazovázzi 7-Ánte, geas ii alddis leat dohkkehuvvon rehketdoalli, lea deavdán su rehketárkka (XLSX, 12 kB) ja dás fas makkár su næringsoppgave lei olggos oaidnit (PNG, 318 kB). Dasa lassin lea son scannen boaldámušguittiid ja bidjan daid mielddusin. Nu ahte dat mildosat maid mii dárbbašetnot meannudit ohcamuša sáhttet leahkit dát:

  1. Næringsoppgave mas boahtá ovdan man ollu ovddas deavdán boaldámuša 2019
  2. Guittet mat čájehit man ollu ovddas deavdán boaldámuša 4 vuosttaš mánu 2019
  3. Guittet mat čájehit man ollu ovddas deavdán boaldámuša 4 vuosttaš mánu 2022
  4. Rehketárka mas buot boaldámušgolut leat rehkenaston oktii

Buot mildosat galget sáddejuvvot regionalforvaltning.no bokte. Jus it hálit olles næringsoppgave sáddet de sáhtát sáddet dan siiddu mas lea boađusrehketdoallu. Poasta nr. 6200 ja nr. 7000 lea dat maid mii dárkkistetnet.

Jus dárbbašat veahki deavdimis 

Jus dus leat hástalusat deavddidettiin regionalforvaltning.no skovi de lea ollu veahkki gávdnamis “brukerstøtte” siiddus. Jus leat eambbo jearaldagat dán ortnega birra de sáhtát váldit oktavuođa ovdánahttinjođiheddjiin Nils Runar Hættain, e-boasta: nrh@kautokeino.kommune.no dahje tlf.: 90 98 03 77.

 

Bilde av bensinpumpe skjerm som viser drivstoffpris - Deaddil ja stuora govva ihtá