Ođđaseamos koronadieđut – vahkku 29

Guovdageainnus ii leat duođaštuvvon koronanjoammun. Leat bidjon 138 koronaboahkkodosa dán vahkku. Buohkat geat leat 18 jagi ja boarráset sáhttet diŋgot diimmu boahkuheapmái.

Korona

Otnáža rádjái (23.07.2021) ii leat dieđihuvvon koronanjoammun Guovdageainnu suohkanis. Leat váldon sullii 525 koronaiskosa ovddit vahkku, ja eai lean positiiva iskkusbohtosat.

Guovdageainnu suohkana ođđaseamos koronadieđut almmuhuvvojit juohke bearjadaga.

 

Koronaboahkuheapmi

Vahkku 29 ožžui Guovdageainnu suohkan 25 koronaboahkkoláse. Dađi bahábut báhce 5 boahkkoláse dán vahkku, mat leat sullii 30 boahkkodosa. Vai eat vásit ahte báhcet boahkkodosat ávžžuhit buohkaid geat eai leat váldán vuosttaš boahkkodosa diŋgot boahkuhanáiggi Helsenorge siiddu bokte dahje riŋget boahkuhankoordináhtorii, telefovdna nummár: 485 00 784

Lea dehálaš ahte buohkat váldet boahku vai mii ovttas birget koronavirusiin.

Leat ollu rabas áiggit koronaboahkuheampái boahtte vahkku, gaskavahkku 28.07.2021.

Movt galgá diŋgot áiggi koronaboahkuheapmái? 

 

Guovdageainnu suohkan lea dán vahkku bidjan 138 koronaboahkkodosaid, dain leat 126 olbmo geat leat ožžon vuosttaš boahkkodosa ja 12 leat ožžon nuppi dosa. Dál leat oktiibuot 1548 olbmo Guovdageainnus ožžon vuosttaš koronaboahkkodosa ja 814 olbmo leat ollislaččat boahkuhuvvon.

Dáppe sáhtát geahččat Guovdageainnu koronaboahkkologuid. 

Guovdageainnu suohkan fállá boahku buohkaide geat leat 18 jagi ja boarráset. Sii sáhttet diŋgot diimmu koronaboahkuheapmái Helsenorge siiddu bokte dahje riŋget boahkuhankoordináhtorii telefovdna nummár: 485 00 784

Muittuhit ahte boahkuheapmi joatká LES-viesus.