Ođđaseamos koronadieđut – vahkku 23

Guovdageainnus ii leat koronanjoammun, ja ovdalaš dieđihuvvon positiiva koronaiskosat čájehuvvo leat behtolaš positiiva.

Korona

Vahkku 22 leat váldon 54 koronaiskosa Guovdageainnu dearvvašvuođaguovddáža vuoiŋŋahatklinihkas. Eai lean positiiva iskkusbohtosat.

 

Ovdalaš dán vahkku dieđihuvvui ahte guoktásis lei positiiva koronaiskkusvástádus Guovdageainnu vuoiŋŋahatklinihkas. Dál lea duođaštuvvon ahte dát iskosat ledje behtolaš positiivvat. Dat mearkkaša ahte dat iskkusbohtosat mat čájehedje korona-njoammuma dan guoktásis, eai lean riekta.

Iskosat mat čájehedje positiiva bohtosiid, ledje johtilisiskosat váldon dan oktavuođas go soai leigga Guovdageidnui boahtán HV-hárjehallamii. Lassin johtilisiskosii váldui PCR-iskkus, ja dás lei negatiiva boađus.

Johtilisiskosat leat reaiddut mat leat mielde ráddjet koronavirusa leavvamis. Muhto lea PCR-iskkus, mii dán oktavuođas váldui maŋŋil, mii addá sihkkareamos vástádusa.

Buohkat geat ledje bidjon erremii dán oktavuođas leat ožžon dieđu ahte eai leat šat erremis. Guovdageainnu suohkanis ii leat koronanjoammun dál.

 

Koronaboahkuheapmi

Guovdageainnu suohkan lea dán vahkku bidjan 148 koronaboahkkodosaid, dain leat 58 olbmo ožžon vuosttaš dosa ja 90 olbmo leat ožžon nuppi dosa.

Geahča Guovdageainnu koronaboahkuhanloguid dáppe.

Guovdageainnu suohkan vásiha váttisvuođaid sáddemis koronaboahkuhan áiggiid SMS bokte. Leat bargagoahtán gávdnamis čovdosa dása.