Guovdageainnu kulturskuvlla FÁRUS

Don gii leat gaskal 12 ja 19, ja beroštat oahppat čuojahit, lávlut, dánsut, filbmet dahje juoigat. Dá lea dutnje!

Guovdageainnu Kulturskuvla álggaha FÁRUS prošeavtta mas lea mihttun čohkket 35 nuora (12-19 j.) ovtta oktasaš čájálmassii. Prošektii servet njeallje oahpaheaddji geat oahpahit sihke musihka, lávluma, dánsuma ja filbmema. Čájálmas čájehuvvo Sámiálbmotbeaivvi 2021.

FÁRUS prošeakta čatná máŋgga dáiddasuorggi oktii nugo musihka, dánsuma ja filbmema. Dáid dáiddasurggiid vuođul galget nuorat ovttas oahpaheddjiiguin hábmet ámmátlaš čájálmasa. Oahpaheaddjit leat Ánna-Katri Helander (dánsun), Inger Johanne Oskal (vokála ja čuojaheapmi), Anthoni Hætta (čuojaheapmi) ja Andreas Leonardsen (filbmen).
Ulbmil dáinna prošeavttain lea nannet kultuvrralaš oktavuođaid nuoraid gaska Guovdageainnus. Kulturskuvla háliida addit nuoraide vejolašvuođa bargat musihkain, dánssain ja filmmain, ja leahket oassi hábmeme stuora čájálmasa álggu rájes.

Mii ávžžuhit buot musihkka-, filbma ja dánsenberošteaddjit gaskal 12-19 jagi váldit oktavuođa Guovdageainnu Kulturskuvllain. Mis leat dušše 35 saji, ja fertet vuoruhit daid ohccanskovit mat bohtet álggos. Dieđit beroštumi nu jođánit go vejolaš, ja leage mielde hábmeme somás ja earenoamáš birrasa Guovdageainnus!

Oahpahusgiella lea sihke sámegiella ja dárogiella.


Dieđit beroštumi kulturskuvlla jođiheaddjái, Marie. Sáddes e-boastta dahje riŋge/tekste 92287543

Dieđihanskovvi FÁRUS (PDF, 159 kB)

 

OANEHAČČAT: “FÁRUS 2020-2021”

MII:
Stuora prošeakta gos 4 oahpaheaddji galget oahpahit 35 nuoraide musihka, dánsuma ja filbmema, mii galgá čájehuvvot Sámiálbmotbeaivvi 2021.

GEAT: Nuorat gaskal 12-19 jagi. Dus ferte leahket beroštupmi musihkkii, dánsii dehe filbmemii. Musihkkárat sáhttet čuojahit čuojanasaid (gitára, bássa, piáno, rumbbuid, ukulele, ja ain viidáset) dehe lávlut/juoigat. Dat lea ovdamunni jus don máhtát jo čuojahit.

GOS: Hárjehallamat leat Guovdageainnu Kulturskuvllas. 

GOAS: Disdagaid 18:00-20:00 dahje gaskavahkuid 16:00-18:00

VUOSTTAŠ DEAIVVADEAPMI: Mánnodaga 9.11.2020 18:00-20:00 ja disdaga 10.11.2020 18:00-20:00. Buohkat deaivvadit goappaš beivviid.

DIEĐIHANÁIGEMEARRI: Mis lea rabas dieđihanáigi, muhto mii ávžžuhit sáddet ohccanskovi nu jođánit go vejolaš.

OAHPAHEADDJIT: Ánna-Katri Helander (dánsa ja koreografiija), Inger Johanne Oskal (vokála ja čuojaheapmi), Anthoni Hætta (čuojaheapmi) ja Andreas Leonardsen (filbmen)